איראק - אידן איבער די וועלט האבן מיט גרויס פרייד און דערלייכטערונג אויפגענומען די נייעס אז די טויט אורטייל וואס האט געדראעט אויפן קאפ פון דער אידישער בחור בנימין כאסין איז אנולירט געווארן און אויפגעטוישט געווארן צו א מינימאלע טורמע טערמין, דאס קומט נאך א מאסיווע קאמפיין אין די וואכן בעפאר דעם פארלאפענע ראש השנה ווי כלל ישראל האט זיך פאראייניגט צו ראטעווען דעם בחור און ברענגען די נויטיגע סומע צו איבערבעטן דעם פאמיליע וואס האט בחסדי השם אנגענומען דעם ׳סולכא׳ אנבאט פון א פערטל מיליאן דאלאר.

די געשיכטע גייט צוריק מיט איבער צען יאר ווען בנימין האט אפגערייזט פון ארץ ישראל קיין איראק באזוכן פאמיליע מיטגלידער וואס וואינען דארטן, זייענדיג דארט האט ער זיך אנגעשלאסן אין די קורדישע קרעפטן צו קעמפן קעגן די אייסיס טעראר גרופע, איינע פון די טעג האט א טעקסי דרייווער אים געוואלט איבערגעבן פאר אייסיס, נאך א געפעכט איז דער דרייווער פארוואונדעט געווארן און שפעטער געשטארבן, בנימין איז ארעסטירט געווארן און דערנאך ליידער פאראורטיילט געווארן דורך די רעגירונג צום טויט דורך הענגען רח"ל.

נאך לאנגע יארן פון שתדלנות האבן זיך אין די לעצטערע חדשים א גרופע היימישע עסקנים און אדוואקאטן אריינגעלייגט צו אנולירן דעם טויט אורטייל דורך א ׳סולכא׳ פראצעדור ווי די פאמיליע פארגעבט אויף זייער קלאגע פאר א גרויסע סומע געלט, טויזנטער אידן האבן זיך אנגעשלאסן אין דעם קאמפיין און עס איז געשאפן געווארן די נויטיגע סומע צו איבערבעטן די פאמיליע.

די וואך האבן עסקנים און אדוואקאטן אין שפיץ פונעם מתיר אסורים הגה"צ רבי חיים יוסף דוד ווייס שליט"א דומ"ץ סאטמאר אנטווערפן, ר׳ מאיר צבי טויבער פון מאנסי, אדוואקאט ר׳ אברהם לאווי און ר׳ גרשון צבי וועסט, זיך ארויסגעלאזט צום קורדישע טייל פון איראק און אפגעהאלטן עטליכע זיצונגען מיט די פאמיליע, בחסדי השם איז געלונגען צו אויסארבעטן דעם ׳סולכא׳ מיטן שענקן א פערטל מיליאן דאלאר וואס איז אויף געטריבן געווארן אויף די פאפולערער ABCAHRITY.ORG וועב זייטל פאר די פאמיליע און עס באשטעטיגט ביי דער ריכטער פון די קעיס, די טויט שטראף איז געביטן געווארן פאר א מינימאלע טורמע טערמין און מ׳האפט אז דער בחור וועט בקרוב קענען באפרייט ווערן מאפילה לאורה אהיים צו זיין בענקעדיגע פאמיליע.

כלל ישראל טיט אויסשרייען אשריך פאר די מסירת נפשדיגע עסקנים 

ר' שמעון ראלניצקי  הגה"צ רבי חיים יוסף דוד ווייס שליט"א דומ"ץ סאטמאר אנטווערפן, ר' שמעון ראלניצקי  ר׳ מאיר צבי טויבער פון מאנסי, אדוואקאט ר׳ אברהם לאווי און ר׳ גרשון צבי וועסט, און ר' הערשל גאדינגער