*היסטארישע נסיעה פון הנהלת 'רופא חולים' העולמי מיט'ן ציל צו פארברייטערן 'רופא חולים ירושלים'*

ווי באקאנט, צוליב די גאר שווערן מצב מיט חולי ישראל אין ארה"ק, ווען ס'איז אוממעגליך ווייטער צו קענען אנגיין אין דעם יעצטיגן קליינעם אפיס'ל, האט די הנהלה געמוזט אריינשפרינגען *אין א ריזיגע מולטי-מיליאן דאלער'דיגע בוי פראיעקט אהערצושטעלן א נייעם 'מבצר הרפואה'* כדי צו קענען נאכקומען די וואקסנדע געברויך און צו פארברייטערן די סערוויסעס פאר חולי ארה"ק.

פארלאפענע וואך זענען ספעציעל אראפגעפארן די חברי הנהלת המוסד פון ניו יארק, ה"ה מו"ה *אלי' ליפא קאהן* הי"ו, הרב *זלמן לייב הורוויץ* הי"ו און מו"ה *יואל בערנאטה* הי"ו, זיך אומקוקן אויפ'ן נייעם פלאץ און גלייכצייטיג *שטעלן א יסוד צו פארברייטערן די הכנסות פאר'ן מוסד*, וואס קאסט היינט אפ קרוב צו *זעקס מיליאן דאלער*, דורכ'ן שאפן נדבות פון חברי הקהלות בארה"ק.

אין איינע פון די מעמדים, זענען זיך מאנטאג פ' וארא צוזאמענגעקומען *פארטרעטער פון אלע גרעסערע קהלות בארה"ק*, במטרה לטכס עצה ותושי' און צו שטעלן א יסוד אריינצוברענגען אלע קהלות הקודש אלס שותפים אינעם מוסד. עס האבן אויפגעטרעטן הרב *ראובן ברוין*, מנהל 'רופא חולים ירושלים', הרב *זלמן לייב הורוויץ* בשם חברי הנהלת המוסד, און ר' *זושא לעווי*, גלאבעל דירעקטאר פון פאציענטן סערוויסעס. 

די עסקני הקהלות האבן אויפגענומען די בקשה פון רופא חולים מיט אויסטערלישע ווארימקייט. אויפ'ן פלאץ האבן *די גרויסע עסקני הקהלות דעבאטירט צווישן זיך די ריכטיגע אופנים* ווי אזוי דורכצופירן דעם פראיעקט, יעדע קהלה לויט זייער שטייגער און מהלך, מיט'ן ציל צו שטעלן דעם מוסד אויף די פיס בס"ד.