פון חצר הקודש וויזניץ קומט די מעלדונג אז במשך פונעם טאג האט כ''ק אדמו"ר מוויזניץ שליט"א געשפירט א שוואכקייט, און לויט די אנווייזונג פון די דאקטוירים איז דער רבי אנגעקומען אין שפיטאל פאר וויכטיגע בדיקות. ברוך השם, נאכדעם וואס די רעזולטאטן זענען צוריקגעקומען פולשטענדיג נארמאל, האט זיך דער רבי שליט"א צוריקגעקערט צו זיין אכסניה אין מושב אורה. לויטן פלאן איז ערווארטעט אז ער וועט זיך אומקערן למעון קדשו לקראת די ימי ראש השנה,

היינט ביינאכט האבן זיך פארזאמלט טויזנטער חסידי וויזניץ אינעם היכל ביהמ"ד הגדול אין קריה, צו זאגן דעם גאנצן ספר תהילים לרפואתו פונעם כ''ק אדמו''ר מוויזניץ שליט''א. בעפארן זאגן תהילים, האט דער רבי געהייסן אויסרופן אז מען זאל אינזינען האבן ביי די תפילות פאר די רפואה פון זיין שוואגער, כ''ק אדמו"ר מבעלזא שליט''א, רבי ישכר דוב בן מרים.

דער רבי האט צווישן אנדערע ווידער אפגעשטאט א ביקור חולים אינעם צימער פון זיין שוואגער, כ''ק אדמו''ר מבעלזא שליט''א. און כלל ישראל ווערט ווייטער געבעטן צו מתפלל זיין פאר די רפואה שלימה פון רבי ישראל בן לאה אסתר.

אין דער זעלבער צייט, האט דער מזכיר הבית אין בעלזא, הרב משה רינגל, איבערגעגעבן א ספעציעלע מעלדונג איבער דעם מצב הבריאות פון כ''ק אדמו"ר מבעלזא שליט"א. לויט דער מעלדונג, נאך אלע בדיקות וואס זענען דורכגעפירט געווארן, האט מען אנטדעקט אז עס איז געווען אן אינפעקציע וואס מען האט שוין באהערשט. פונדעסטוועגן, נאך די רעקאמענדאציע פון די דאקטוירים וועלכע האבן געבעטן אנצוהייבן די מעדיצינישע באהאנדלונג קעגן די אינפעקציע אינעם שפיטאל אליין, וועט דער רבי פארבלייבן דעם קומענדיגן מעת לעת אין שפיטאל, און עס ווערט געבעטן פון כלל החסידים ממשיך צו זיין צו איינרייסן פאר די פולשטענדיגע רפואה שלימה פון רבי ישכר דוב בן מרים לרפו"ש.

הרה''צ ר' שלום רוקח שליט''א איז היינט ארויסגעפארן קיין בעלזא שטעטל מתפלל צו זיין פאר זיין זיידן כ''ק אדמו"ר מבעלזא שליט"א לרפו"ש, אינעם יומא דהילולא פון הרה''ק מהר"ש מבעלזא זי"ע.

יעצט קומט פאר א מעמד 'לחיים' ביים רבי'ן אין זיין צימער אינעם 'הדסה עין כרם' שפיטאל, לרגל דעם יומא דהילולא פון זיין זיידן מרן ה'שר שלום' מבעלזא זיע"א. אינעם מצומצמ'דיגן מעמד באטייליגן זיך זיין זון הרה"צ רבי אהרן מרדכי רוקח שליט"א און די אייניקלעך.