דער רבי האט אמאל פארציילט: דער הייליגער שטעפינעשטער איז געווען א בן יחיד פון זיין הייליגן טאטע'ן הרה"ק ר' מנחם נחום זי"ע (בן הרה"ק קדוש ישראל מריזין זיעועכי"א). אלס יונגערמאן איז דער שטעפינעשטער אמאל געווען ביי א גרויסער רבי'שע חתונה, אין וועלכער הרה"ק ר' אהרן מטשערנאבל זי"ע האט זיך באטייליגט. דער שטעפינעשטער האט זיך דארט געגעבן א שטופ-דורך, כדי צו געבן לחיים פאר די צדיקים וואס זענען געזעצן אויבן אהן. ווען זיין הייליגער טאטע הרה"ק ר' מנחם נחום האט געזהען ווי זיין זוהן פרובירט זיך דורך צושטופן, האט ער זיך אנגערופן: - לאזט דורך מיין איינציגער הייליגער זוהן! ווען הרה"ק ר' אהרן מטשערנאבל האט געהערט די ווערטער, האט ער אויפגעהויבן זיינע הייליגע אויגן-ברעמען, און ער האט אנגעקוקט דעם שטעפינעשטער. דערנאך האט זיך הרה"ק ר' אהרן אויסגעדריקט: אהא! אהא!