רוסישע מיסיל אטאקע אויף א גראסערי אין כארקעוו לאזט איבער 3 טויטע און צענדליגע פארוואונדעטע טראץ פרישע פייער-אפשטעל מעלדונג

א רוסישע מיסיל האט זונטאג אוונט (אקטאבער 11) אריינגעקראכט אין א גראסערי געשעפט אין א רעזידענשעל געגנט אין די שטאט כארקעוו, איבערלאזנדיג 3 טויטע און אמווייניגסטנס 9 פארוואונדעטע, אריינגערעכנט צוויי קינדער.

דער הויפט פון די כארקעוו ראיאן מיליטערישע אדמיניסטראציע, אלעג סיניעהובאוו, האט געמאלדן די טראגישע ציפערן אויף זיין טעלעגראם אקאונט. לויט אים האט מען אנהייב געמיינט אז עס האנדלט זיך בלויז פון עטליכע לייכט פארוואונדעטע, אבער די סיטואציע אויפן ארט האט זיך שנעל געטוישט. שפעטערדיגע באריכטן געבן אן אז די צאל פארוואונדעטע קען זיין פיל העכער, גרייכנדיג ביז 20 מענטשן, און די ענדגילטיגע ציפערן קענען זיך נאך טוישן.

די מעכטיגע אויפרייס האט אינגאנצן חרוב געמאכט דעם געשעפט און געפירט צו א גרויסע פייער וואס האט פארשלינגען אמווייניגסטנס פינף קארס וואס זענען געווען דארט פארקירט. עמערדזשענסי מעדיקעל טיעמס און רעטונגס ארבייטער זענען תיכף אראפגערופן געווארן צום סצענע ארויסצושלעפן די קרבנות פונעם כאאס. בילדער פונעם ארט צייגן שווער-געשעדיגטע געביידעס און פארברענטע קארס אין א געגנט וואס איז פיל מיט פשוט'ע ציווילע הייזער און נישט קיין מיליטערישע באזעס.

די בלוטיגע אטאקע קומט אין א גאר סענסיטיווע צייט: בלויז עטליכע שעה בעפאר האט פרעזידענט דאנאלד טראמפ דעקלערט אן "ענערגיע פייער-אפשטעל" צווישן רוסלאנד און אוקראינע, אן אפמאך וואס איז דערווייל נישט באשטעטיגט געווארן דורך קייעוו אדער מאסקווע. דער אוקראינישער פרעזידענט וולאדימיר זעלענסקי האט אבער אנגעוויזן אז רוסלאנד האט באמבארדירט די כארקעוו 'CHP-5' פאוער-פלענט גלייך נאך די מעלדונג, און די אטאקע אויפן גראסערי איז נאכגעפאלגט קורץ דערויף. אין א באזונדערע רוסישע אטאקע דעם זעלבן אוונט זענען נאך 3 מענטשן אומגעקומען אין איוואנא-פראנקיווסק, אין מערב אוקראינע.

פאר א שטאט ווי כארקעוו וואס איז א כסדר'דיגע ציל זינט די מלחמה האט אויסגעבראכן, שטעלט די פרישע אטאקע א שווערע פראגע צייכן צי סיי וועלכע פייער-אפשטעל מעלדונגען קענען למעשה צושטעלן שוץ פאר די ציווילע איינוואוינער וואס לעבן אונטער די טעגליכע רעגן פון רוסישע מיסילס.