שוידערליכע אינצידענט אין אויסטראליע: צוויי טינעידזשערס אויף 'דזשעט סקיס' דרייען איבער א קליין שיפל מיט צוויי קינדער דערין

א גרויסע אויפברויז איז אנטשטאנען אין די 'גאלד קאוסט' ראיאן אין אויסטראליע, נאכדעם וואס א שאקירנדע ווידיאו איז ארויפגעשווימען, וואו מען זעט ווי צוויי טינעידזשערס אויף 'דזשעט סקיס' פליען ארום און שפריצן בכיוון אויף א קליין שיפל, ביז עס האט זיך איבערגעדרייט און אריינגעווארפן א 10-יעריג און א 14-יעריג קינד אין די טיפע וואסערן פונעם נעראנג טייך.

דער אינצידענט האט זיך אפגעשפילט דעם פארגאנגענעם אקטאבער 4. די צוויי דזשעט סקי פירער, אין עלטער פון 15 און 16 יאר, האבן ארומגערינגלט דאס קליינע שיפל און כסדר געשפריצט כוואליעס דערויף, ביז דאס שיפל האט זיך איבערגעקערט. אומשטייערע וועלכע האבן צוגעזען דעם שרעקליכן סצענע זענען תיכף אריינגעשפרינגען און ארויסגעצויגן ביידע קינדער אומבאשעדיגט. א לאקאלער איינוואוינער האט רעקארדירט דעם גאנצן עפיזאד, און די ווידיאו האט זיך שנעל פארשפרייט אויף די סאשעל מידיא און געפירט צו אן אינטענסיווע פאליצייאישע אויספארשונג. די לאקאלע קווינסלענד פאליציי האט באשטעטיגט אז די צוויי גרופעס האבן זיך קיינמאל פריער נישט באגעגנט, און עס איז געווען א ריין בייזוויליגע אקט.

אינוועסטיגעיטארס האבן נאכגעספורט די צוויי טינעידזשערס אין בלויז עטליכע טעג. זיי האבן דורכגעפירט א זוכונג אין זייערע היימען אין די בראדביטש און מערמעיד וואטערס געגנטער, און האבן קאנפיסקירט ביידע דזשעט סקיס אלס באווייז. די צוויי יוגנטליכע זענען אנגעקלאגט געווארן מיט שווערע טשארדזשעס פון געפארפולע אפערירונג פון א שיף און אטאקע (עסאלט).

לאקאלע איינוואוינער וועלכע האבן מיטגעהאלטן דעם כאאס זאגן אז די צוויי האבן אפילו נישט פרובירט צו קוקן וואס עס טוט זיך מיט די קינדער נאכדעם וואס דאס שיפל האט זיך איבערגעדרייט, וואס דאס האט נאך מער אויפגעפלאמט דעם כעס פונעם פובליק. איינוואוינער אין די געגנט זאגן אז ענליכע ווילדע אינצידענטן קומען פאר כמעט יעדע וואך, און פאדערן שטרענגערע פאליצייאישע קאנטראל און הארבערע שטראפן. דער מעיאר פון גאלד קאוסט, טאם טעיט, האט אראפגעריסן דעם אינצידענט אלס "אומפארשטענדליך", בעת די דרוק פונעם פובליק וואקסט אז די אויטאריטעטן זאלן נעמען שטרענגע שריט בעפאר אזעלכע ווילדע אקטן ענדיגן זיך מיט א טראגעדיע חלילה.