בס"ד

מדינת ישראל מיליטער באמבארדירט די 'איסלאמישע אוניווערסיטעט' אין עזה; עטליכע אומגעקומען און פארוואונדעט

לויט פאלעסטינער באריכטן, האט דאס מדינת ישראל מיליטער זונטאג, אקטאבער דעם 25'סטן, דורכגעפירט לופט-אטאקעס אויפן קעמפוס פון די 'איסלאמישע אוניווערסיטעט' וואס געפינט זיך אין מערב עזה סיטי.

לויט די אוניווערסיטעט פירערשאפט, האט די ערשטע אטאקע פארוואונדעט פינף מענטשן, וואס האט געפירט דערצו אז מען זאל צייטווייליג אפשטעלן אלע אקאדעמישע און אדמיניסטראטיווע אקטיוויטעטן אויפן קעמפוס. א צווייטע אטאקע, לויט לאקאלע קוועלעס, האט אומגעברענגט דריי מענטשן וועלכע זענען אידענטיפיצירט געווארן אלס זיכערהייט וועכטער. ווידעא קליפס פונעם סצענע צייגן א כאאס, מיט רויך און פאניק, ווי מאסן מענטשן אנטלויפן אין שרעק נעבן די חרוב'ע געביידעס און קארס.

פאלעסטינער נייעס אגענטורן באריכטן אבער מיט פארשידענע ווערסיעס איבער ווער עס זענען געווען די צילן פון די אטאקעס. טייל זאגן אז עס איז געווען א פארזאמלונג פון ציווילע בירגער, בעת אנדערע באריכטן אז סטודענטן זענען צווישן די פארוואונדעטע. דערווייל האט דאס מיליטער נאכנישט ארויסגעגעבן קיין אפיציעלע סטעיטמענט צו ערקלערן די אטאקע.

די איסלאמישע אוניווערסיטעט, וועלכע איז געגרינדעט געווארן אין יאר 1978, ווערט פאררעכנט אלס די סאמע גרעסטע און העכסט-ראנגיקע אוניווערסיטעט אינעם עזה פאס, און איז שוין עטליכע מאל געווארן באמבארדירט זינט די מלחמה האט אויסגעבראכן אין אקטאבער 2023. דער קעמפוס אין עזה סיטי האט שוין געליטן שווערע שאדנס און אסאך בנינים זענען אינגאנצן חרוב געווארן. אין לויף פון די יארן 2023 און 2024 זענען 56 אנגעשטעלטע פונעם אוניווערסיטעט אומגעקומען, אריינגערעכנט דער פרעזידענט פונעם אוניווערסיטעט, סופיען טאיע.

די היינטיגע אטאקעס קומען אין א צייט וואס מדינת ישראל דראון אטאקעס און שיסערייען האבן אויך אומגעברענגט און פארוואונדעט פאלעסטינער אין אנדערע טיילן פון עזה, אריינגערעכנט נעבן דיר על-באלאח. די עזה עדיוקעישאן מיניסטעריום זאגט אז צען סטודענטן און א לערער זענען אומגעקומען אין מדינת ישראל אטאקעס אין די לעצטע טעג. די הויפט פראגעס וואס בלייבן יעצט אפן זענען: ווער זענען געווען די עכטע צילן פון די אטאקע? צי זענען ציווילע בירגער צווישן די טויטע? און ווען וועט די אוניווערסיטעט זיך קענען צוריק עפענען?