פרישע כוואליע פון באמבע סטראשונגען שטערט 27 פלייטס איבער אייראפע

א פרישע כוואליע פון באמבע סטראשונגען האט דעם נאוועמבער 5 געשטערט אמווייניגסטנס 27 פאסאזשירן פלייטס איבער אייראפע, וואס האט אריינגעווארפן די לופטפעלדער אין א כאאס און געצווינגען די עירליינס און אוויאציע אויטאריטעטן צו נעמען עמערדזשענסי זיכערהייט שריט.

לויט א באריכט פון די 'רויטערס' נייעס אגענטור, זענען צווישן די אפעקטירטע עירליינס אריינגערעכנט עיר לינגוס, וויז עיר, לאט, פינאייר, איזי-דזשעט און איבעריע. די פלייטס וואס זענען געווארן אפעקטירט זענען געווען אויפ'ן וועג צו פארשידענע הויפט שטעט, אריינגערעכנט פאריז, רוים, פראג, בריסל און מילאן.

אלס רעזולטאט פון די שרעקעדיגע סטראשונגען זענען עטליכע פליגערס פארדרייט געווארן פון זייער ארגינעלן רוט, בעת מיליטערישע קאמפס-פליגערס זענען ארויסגעשיקט געווארן צו באגלייטן געוויסע פלייטס אין די לופטן אלס טייל פון די רעאקציע דורך די זיכערהייט אויטאריטעטן.

נאך גרונטליכע זוכונגען האבן די אויטאריטעטן באשטעטיגט אז מען האט ברוך השם נישט געפונען קיין שום אויפרייס מאטעריאלן. די אויספארשער האבן דערווייל נאכנישט פעסטגעשטעלט ווער עס שטייט אונטער די פאלשע אלארמען.

די יעצטיגע אינצידענטן קומען נאך א פריערדיגע כוואליע פון ענליכע סטראשונגען, וואס וועקט אויף פרישע זארגן און פראגע צייכנס איבער די זיכערהייט פון לופט-פארקער איבער גאנץ אייראפע.