בלוטיגע שיסעריי ביי א לוויה אין ירדן לאזט איבער 6 טויטע און צענדליגע פארוואונדעטע

א לוויה אין מערב ירדן האט זיך פרייטאג פארוואנדלט אין א שרעקליכע סצענע, ווען דריי באוואפנטע פארשוינען האבן געעפנט פייער אויף די פארזאמלטע. לויט די אפיציעלע באריכטן פון ירדן, זענען 6 מענטשן אומגעקומען און 28 זענען פארוואונדעט געווארן.

די שיסעריי איז פארגעקומען אינדרויסן פון א קירכע אין די 'על-קאראק' פראווינץ. עדות האבן דערציילט פאר די ארטיגע נייעס אגענטורן אז די אטאקירער זענען אנגעקומען מיט א קאר און האבן אנגעהויבן שיסן מיט רייפלס און פיסטאלן פאר עטליכע מינוט נאכאנאנד, בעפאר זיי זענען אנטלאפן פונעם סצענע.

די ארטיגע סטעיט טעלעוויזיע האט שפעטער געוויזן סעקיוריטי קעמערע (CCTV) ווידעא פון די אטאקע, און די זיכערהייט קרעפטן האבן אונטערגענומען א מאסיווע זוכעניש נאך די שיסערס.

אומקלארע מאטיוון

אזא סארט אטאקע איז א זעלטנהייט אין ירדן, א לאנד וואס ווערט געווענליך באטראכט ווי א סטאבילע ארט אין די אומרואיגע מיטל-מזרח ראיאן. רעגירונג באאמטע האבן שארף פארדאמט די ברוטאלע אטאקע, אבער דערווייל האט נאך קיין שום גרופע נישט גענומען פאראנטווארטליכקייט דערויף. עס זענען נאך נישט דא קיין ארעסטירטע, און די מאטיוו אונטער די שיסעריי איז נאך אומקלאר.

די ערשטע באריכטן איבער די צאל געטראפענע זענען געווען אביסל צעמישט. טייל נייעס קוועלער האבן באריכטעט איבער 7 טויטע און ארום 10 פארוואונדעטע. ווי אויך זענען דא פארשידענע באריכטן צי די באוואפנטע האבן זיך אריינגעבראכן אינעם געביידע אדער בלויז געשאסן אויף די מענטשן אינדרויסן. די דעטאלן וועלן ווארשיינליך קלארער ווערן ווי נאר די אויספארשער וועלן צוזאמשטעלן דעם בילד פון וואס פונקטליך עס האט זיך דארט אפגעשפילט און ווער עס שטייט אונטער דעם.