זעלטענע אימיגראנטן כאפונג: פעדעראלע אגענטן שטעלן אפ א שמוגלער שיפל נעבן פלארידע מיט 13 כינעזער בירגער

פעדעראלע אגענטן האבן די וואך דורכגעפירט א זעלטענע און געפארפולע אפעראציע אויפ'ן וואסער, ווען זיי האבן אפגעשטעלט א 27-פוסיגע שמוגלער שיפל נעבן 'קי לארגא' אין פלארידע, וואס האט געטראגן 23 אומלעגאלע אימיגראנטן, אריינגערעכנט 13 כינעזער בירגער.

די 'קאסטעם און בארדער פאטראל' (CBP) אינאיינעם מיט די קאוסט גארד האבן באמערקט דאס איבערגעפילטע שיפל דורכאויס א לופט פאטראל, און זענען שנעל אריינגעקומען אין אקציע. זיי זענען ארויפגעגאנגען אויפ'ן שיפל נעבן די פלארידע ברעגעס בעפאר עס האט געקענט גרייכן די יבשה. באאמטע האבן אנגערופן די רייזע אלס "גאר געפארפול", א סארט אפענע-וואסער רייזע וואס האט זיך שוין ארויסגעשטעלט צו זיין טויטליך פאר אימיגראנטן וואס פרובירן דאס צו טון אין קליינע, אומסטאבילע שיפלעך. צווישן די ארעסטירטע איז געווען א קובאנער בירגער וואס איז פארדעכטיגט אין פירן די שמוגלעריי אפעראציע, און ער שטייט יעצט אויס פעדעראלע קלאגעס.

וואס האט געכאפט די ספעציעלע אויפמערקזאמקייט פון די אויספארשער איז די אידענטיטעט פון די פאסאזשירן. כינעזער בירגער פרובירן גאר זעלטן צו נוצן די קאראבישע ים רוטעס, וואס ווערן געווענליך גענוצט דורך אימיגראנטן פון האיטי, דאמיניקען רעפובליק און קובא. אין די לעצטע יארן זענען רוב כינעזער אימיגראנטן אריבערגעקומען דורך די יבשה גרעניצן אין קאליפארניע און טעקסאס.

אבער וויבאלד די יבשה רוטעס זענען יעצט שטארק פארשלאסן אונטער א שטרענגערע גרעניץ קאנטראל, זאגן קוועלער אז די שמוגלער נעצן הייבן אן צו טוישן זייערע טאקטיקן, און שטופן די אימיגראנטן צו נעמען פיל מער ריזיקאלישע וואסער רייזעס. א לופט אינפרא-רויט ווידעאו פון די אפעראציע צייגט ווי אמעריקאנער שיפן קומען נאנט צום פארדעכטיגטן שיפל אין רעאלע צייט, וואס גיט א זעלטענע בליק וויאזוי די לופט און ים אינפארסמענט מיסיעס זענען אזוי גוט קאארדינירט.