דורכפאל פאר עפל: זייער ערשטע 'פאלדעיבל' טעלעפאן פאלט דורך א שווערע דורעביליטי טעסט

עפל'ס ערשטע פאלדעיבל טעלעפאן, די "אייפאן דואא" (iPhone Duo), וואס קאסט אן אסטראנאמישע פרייז פון 1,999 דאלאר, איז דורכגעפאלן א באקאנטע דורעביליטי טעסט, פונקט ווען עס איז אנגעקומען אין די געשעפטן דעם 23'סטן אקטאבער 2026.

דער באקאנטער יוטובער זעק נעלסאן פון 'JerryRigEverything' האט אונטערגעווארפן דעם נייעם פאון צו א רייע שווערע פראבעס, און די רעזולטאטן זענען נישט געווען קיין גוטע. לויט ווי ער צייגט, האט די אינדרויסנדיגע סקרין - וואס איז באשיצט מיט עפל'ס 'סעראמיק שילד 2' - זיך גאנץ גוט געהאלטן קעגן קריצן. אבער די אינעווייניגסטע 7.6-אינטש סקרין איז געווען פיל שוואכער און האט זיך גרינג געקריצט, כאטש א ספעציעלע קאוטינג האט אביסל געהאלפן פארדעקן טייל פון די צייכנס.

דער ערשטער ערנסטער דורכפאל איז געקומען ביים שטויב טעסט. טראץ וואס דער פאון קומט מיט אן אפיציעלע IP68 רעיטינג קעגן שטויב און וואסער, איז פיינע שטויב אריינגעקראכן אינעם 'הינדזש' (דאס פלאץ וואו דער פאון לייגט זיך צוזאם) דורך עטליכע לעכער. דאס האט אינגאנצן איבערגענומען די מאגנעטן וואס זענען געמאכט צו האלטן דעם פאון פארמאכט, און האט איבערגעלאזט דעם פאון אפען און פארכאפט.

די ערגסטע דעמעדזש איז אבער געשען ביים 'בענד טעסט' (בייגן פראבע), וואס האט איבערגעלאזט א פערמאנענטע גרינע ליניע איבער די אינעווייניגסטע סקרין, בעפאר די דיספלעי האט אינגאנצן אויפגעגעבן און אויפגעהערט צו ארבעטן. נעלסאן זאגט אז ער טעסט שוין פאלדעיבל פאונס פאר די לעצטע זיבן יאר, און רוב פון זיי איבערלעבן דעם טעסט, אבער די נייע אייפאן דואא האט עס נישט איבערגעלעבט.

צו מאכן די זאך נאך ערגער, שאצט מען אז צו פאררעכטן אזא אינעווייניגסטע סקרין קאסט ארום 1,000 דאלאר, וואס מאכט דעם דורכפאל פיל מער ווייטאגליך פאר א פאון וואס קאסט סייווי קרוב צו צוויי טויזנט דאלאר.

קריטיקירער ווייזן אבער אן אז די סארט עקסטרעמע בייגן און שטויב טעסטס זענען פיל מער ווי וואס א פאון גייט אדורך ביי א נארמאלע טעגליכע באנוץ. עפל האט דערווייל נישט אפיציעל רעאגירט צו דעם באריכט. די פראגע בלייבט יעצט צי נארמאלע קאסטומערס וועלן זיך טאקע אנשטויסן אין די פראבלעמען, אדער צי דאס זענען בלויז די געווענליכע 'קינדער קרענק' פון אן ערשטע-גענעראציע פאלדעיבל פראדוקט.