פרעזידענט טראמפ: "מיר האבן נישט געהאט קיין אנדערע ברירה - איך וואלט אטאקירט איראן'ס נוקלעארע איינריכטונגען נאך 100 מאל!"

פרעזידענט דאנאלד טראמפ האט ארויסגעגעבן א שטארקע און קלארע מעסעדזש איבער איראן'ס נוקלעארע אמביציעס, דערקלערנדיג אז די פאראייניגטע שטאטן האט נישט געהאט קיין אנדערע ברירה נאר צו נעמען שארפע שריט, און אז ער וואלט געמאכט דעם זעלבן באשלוס נאך הונדערט מאל איבער.

אין קאמענטארן וואס זענען ברייט פארשפרייט געווארן דורך די אפיציעלע ווייסע הויז אקאונטס, האט דער פרעזידענט קלארגעשטעלט: "מיר האבן נישט געהאט קיין אנדערע ברירה, און איך וואלט עס איבערגעטאן נאך 100 מאל. זיי קענען נישט האבן קיין נוקלעארע וואפן - און זיי וועלן נישט האבן קיין נוקלעארע וואפן." די ווערטער באשטעטיגן נאכאמאל די אדמיניסטראציע'ס "אמעריקע פוירסט" צוגאנג צו פארמיידן דעם וועלט'ס גרעסטן שטיצער פון טעראר פון קענען לייגן א האנט אויף די געפארפולסטע וואפן אויף דער וועלט.

די קאמענטארן קומען אין ליכט פון די סוקסעספולע אמעריקאנער מיליטערישע אפעראציעס, אריינגערעכנט די פונקטליכע אטאקעס דורך די מעכטיגע 'B-2' באמבערס אויף וויכטיגע איראנער נוקלעארע איינריכטונגען, וואס האט איבערגעהאקט דעם רעזשים'ס וואפן אנטוויקלונג און שטארק פארמינערט זייער מעגליכקייט צו סטראשען אמעריקע און אירע אליאירטע.

די אטאקעס זענען געווען א קריטישע טייל פון א ברייטערע קאמפיין צו עלימינירן די באלדיגע געפארן וואס קומען פון איראן'ס נוקלעארע פראגראם און איר לאנגע היסטאריע פון אגרעסיע קעגן אמעריקע, מדינת ישראל און אנדערע לענדער אינעם מיטל מזרח. דורכ'ן נוצן פארגעשריטענע 'סטעלט' באמבערס און אנדערע מיליטערישע געצייג, האט די אמעריקאנער מיליטער געוויזן איר אומגלויבליכע קראפט און אנטשלאסנקייט צו צילן די טיף-באגראבענע נוקלעארע צענטערן וואס טעהראן האט גענוצט פאראויסצורוקן אירע געפארפולע פלענער.

טראמפ האט כסדר ארויסגעברענגט אז אן איראנער רעזשים וואס שרייט "טויט פאר אמעריקע" און "טויט פאר מדינת ישראל" קען בשום אופן נישט ערלויבט ווערן צו פארמאגן נוקלעארע וואפן. דאס איז א פאזיציע וואס קומט פונעם ציל צו באשיצן אמעריקאנער לעבנס, טרופן איבער די וועלט, און די זיכערהייט פון אליאירטע לענדער. די ווייסע הויז האט אונטערגעשטראכן דעם מעסעדזש צו ווייזן די אדמיניסטראציע'ס אנטשלאסנקייט זיך צו פאקוסירן אויף רעזולטאטן אנשטאט אויף צייט-פארטרייבנדע פארהאנדלונגען וואס האבן ביז יעצט נאר געגעבן פאר איראן די מעגליכקייט זיך דערנענטערן צו א באמבע.

דער שטרענגער צוגאנג שפיגלט אפ א קלארע פארשטאנד אז שוואכע שריט און דורכגעפאלענע דיעלס מאכן נאר דיקטאטורן מער חוצפה'דיג. פרעזידענט טראמפ'ס פירערשאפט האט צוריקגעברענגט די אמעריקאנער אפשרעקונגס-קראפט, שיקנדיג א קלארן סיגנאל אז די פאראייניגטע שטאטן וועט נישט שטיין אין דער זייט בשעת א ראדיקאלע רעזשים זוכט צו באקומען די מאסן-פארניכטונגס וואפן.

שטיצער פון א שטארקע נאציאנאלע זיכערהייט און די אמעריקע-מדינת ישראל אליאנץ קענען זיין רואיג אז די יעצטיגע אדמיניסטראציע לייגט די פאקוס אויף למעשה'דיגע שריט אנשטאט פוסטע צוזאגן, און לייגט די זיכערהייט פונעם אמעריקאנער פאלק אויבן אן. ווי דער פרעזידענט האט עס קלארגעשטעלט: איראן וועט קיינמאל נישט ערלויבט ווערן אריבערצוטרעטן דעם רויטן ליניע - נישט יעצט, און נישט קיינמאל.