נאך 20 יאר פון סוקסעס: די ULA וואלקען ראקעט קראכט און פארניכטעט 40 עמעזאן סעטעלייטס
גאלערי
ווידעאס
היסטארישע דורכפאל: א 'וואולקאן' ראקעט האט געקראכט אינמיטן פליען, פארניכטנדיג 40 'עמעזאן' סעטעלייטס
פלארידע - די "יונייטעד לאנטש אלייענס" (ULA) קאמפאני האט געליטן א מאסיווע דורכפאל דעם זונטאג, נאוועמבער 15, ווען זייער נייע 'וואולקאן' ראקעט האט געקראכט ארום 10 מינוט נאכן זיך הייבן אין די לופטן פון די קעיפ קענעוועראל ספעיס פארס סטאנציע אין פלארידע. דער קראך האט אינגאנצן פארניכטעט אלע 40 "עמעזאן ליאו" (Leo) בראדבענד סעטעלייטס וואס זענען געווען דערויף.
דער ראקעט האט זיך געהויבן פון 'ספעיס לאנטש קאמפלעקס 41' ארום 12:40 נאכמיטאג. לכתחילה האט אויסגעזען ווי אלץ פארט אדורך כשורה, אבער אינמיטן די רייזע ארויף צום ארביט איז עפעס געגאנגען קרום. יו-על-עי האט באשטעטיגט אז דער ראקעט האט נישט באוויזן צו דעליווערן די עמעזאן סעטעלייטס, וואס דאס צייכנט אפ די ערשטע פולשטענדיגע מיסיע-דורכפאל אין די היסטאריע פון די קאמפאני זינט איר גרינדונג אין יאר 2006.
דער אינצידענט איז גאר א שווערע קלאפ פאר די קאמפאני, קומענדיג נאך כמעט צוויי יארצענדליגען פון סוקסעספולע מיסיעס, און עס ברענגט ארויף פרישע פראגעס איבער די פארלעסליכקייט פון זייער נייע העווי-ליפט ראקעט. דער געפאלענער לאנטש איז אויך געווען די ערשטע פלי פאר די 'וואולקאן' ראקעט אין ניין חדשים, נאכדעם וואס מען האט אפגעשטעלט אלע פליען צו פארראכטן פראבלעמען מיט די ראקעט בוסטערס וואס מען האט באמערקט ביי פריערדיגע מיסיעס. כאטש די בוסטערס האבן דאסמאל געארבעט פעהלערלאז, האט דער קראך פאסירט שפעטער, ווען די העכערע טייל פונעם ראקעט (די אפער-סטעידזש) האט איבערגענומען דעם קאנטראל.
דער דורכפאל איז אויך א שטארקע ריקשריט פאר עמעזאן'ס 'ליאו' סעטעלייט אינטערנעט פראגראם, וואס איז ביז יעצט געווען באקאנט אלס "פראדזשעקט קויפער". דער פראגראם איז געצילט צו בויען א ריזיגע נעצווערק פון סעטעלייטס אין די נידריגע ערד-ארביט, כדי צו קאנקורירן מיט ספעיס-עקס'ס 'סטארלינק'. אלע 40 סעטעלייטס זענען פארלוירן געגאנגען בעפארן אנקומען צו זייער ציל, וואס דאס וועט פארהאלטן עמעזאן'ס פלענער צו פארברייטערן זייער סעטעלייט קאנסטעלאציע. עמעזאן פלאנירט צו נוצן עטליכע לאנטש פראוויידערס, אריינגערעכנט יו-על-עי, בלו ארידזשין, אריאנעספעיס, און ספעיס-עקס, ארויפצושיקן די טויזנטער סעטעלייטס וואס פעלן זיך אויס צוצושטעלן גלאבאלע אינטערנעט דעקונג.
דערווייל איז די פונקטליכע אורזאך פונעם זונטאגדיגן קראך אומבאקאנט. יו-על-עי האט געמאלדן אז זיי וועלן ארבעטן אינאיינעם מיט עמעזאן און אנדערע אגענטורן אויסצופארשן דעם אינצידענט און זען וואס מען דארף פארראכטן. ערשטע אינפארמאציע צייגט אויף א מעגליכע פראבלעם ביי די 'סענטאר' (Centaur) אפער-סטעידזש ברען, כאטש די אויספארשער האבן נאך נישט באשטעטיגט פונקטליך וועלכע טייל האט געברענגט דעם חורבן. דער דורכפאל קען אויך האבן א נעגאטיווע עפעקט אויף יו-על-עי'ס קומענדיגע קאמערציאלע און נאציאנאלע זיכערהייט מיסיעס, בעת אינזשענירן ארבעטן פיבערהאפט צו דערגיין וואס עס איז געגאנגען קרום בעפאר די וואולקאן ראקעטן וועלן קענען צוריק ארויסגיין אין ספעיס.