פארטיידיגונגס סעקרעטאר פיט העגסעט שטעלט ארויס א קעמפערישע ווידעא אינמיטן סטראשונגען פון אימפיטשמענט

פארטיידיגונגס סעקרעטאר פיט העגסעט, וועלכער רופט זיך יעצט "קריגס סעקרעטאר" (Secretary of War) אונטער די נייע פענטאגאן ריברענד, האט דאנערשטאג ארויסגעשטעלט א ווידעא ווי ער רעדט דירעקט צום קאמערע אינדרויסן פון א געביידע מיט די אויפשריפט "דעפארטמענט אוו וואר". דער מעסעדזש איז געלאפן קנאפע זעקס מינוט און איז געווען געבויט ארום איין הויפט ליניע: "מיר שטייען. מיר קעמפן. מיר פארטיידיגן די רעפובליק."

העגסעט האט גערעדט מיט ענטוזיאזם און געמאכט שטארקע האנט באוועגונגען, זאגנדיג אז ער און זיין דעפארטמענט וועלן נישט צוריקטרעטן. ער האט דערקלערט אז "פאטריאטן" זענען יעצט אין קאנטראל פונעם פענטאגאן, און האט געפאדערט פונעם קאנגרעס צו באשטעטיגן מער פאנדינג פאר זיין דעפארטמענט. עס איז אינטערעסאנט אנצומערקן אז דער נאמען "דעפארטמענט אוו וואר" איז א צווייטע נאמען וואס פרעזידענט טראמפ האט געגעבן פאר די דעפארטמענט אוו דיפענס, און עס איז נאכנישט אפיציעל אנגענומען געווארן דורך קאנגרעס.

די טיימינג פון די ווידעא איז וואס מאכט עס פאר הויפט נייעס, קומענדיג בלויז עטליכע טעג נאכדעם וואס די רעפובליקאנער האבן געליטן שווערע פארלוסטן אין די מידטורם וואלן. קאנגרעסמאן טאמעס מעסי פלאנירט ארויפצוברענגען א וואויט אין די הויז קומענדיגע וואך צו אימפיטשן העגסעט, אנגעבנדיג אלס סיבה זיין ראלע אין די איראן מלחמה. רעפובליקאנער קוועלער האבן איבערגעגעבן פאר סי-ען-ען אז זיי ערווארטן אז די אימפיטשמענט זאל דורכגיין.

לויט באריכטן פון סי-בי-עס און ען-בי-סי, האט טראמפ זיך נאכגעפרעגט ביי זיינע ראטגעבער צי העגסעט זאל בלייבן אין אמט. דאך האט טראמפ פובליק געזאגט אז ער האט "יעדע כוונה" אים צו האלטן און האט אנגערופן זיין ארבעט זייער גוט. א ווארטזאגער פאר העגסעט האט רעאגירט אז ער וועט זיך נישט לאזן אפשרעקן פון "פאלשע אויספארשונגען", בעת די דעמאקראטן - וועלכע נעמען איבער קאנגרעס אין יאנואר - האבן שוין געמאלדן אז זיי פלאנירן אים אויסצופארשן.

אפילו אויב די הויז וועט שטימען אים צו אימפיטשן, איז א קאנוויקשאן אין די סענאט זייער אומווארשיינליך. די גרעסערע פראגע בלייבט יעצט צי טראמפ וועט באשליסן אים צו טוישן בעפאר דער נייער קאנגרעס קומט אריין.