'על-3-העריס' אנטפלעקט נייע ריזיגע ראקעטן פאבריק אין ארקענסאו צו דאפלען פראדוקציע

די ריזיגע דעפענס פירמע 'על-3-העריס' (L3Harris) האט געגעבן פאר'ן פובליק אן ערשטן בליק אינעם נייעם 60,000 סקווער-פוס סאליד-ראקעט-מאטאר פאבריק וואס זיי בויען אין קעמדן, ארקענסאו, וועלכע זיי רופן אן די "ארסענאל אוו פרידאם" פעסיליטי.

לויט די פירמע איז דאס איינע פון די מערסט מאדערנע ראקעט-מאטאר פאבריקן אין דער וועלט. עס קאמבינירט פארגעשריטענע טעכנאלאגיע, דיגיטאלע פראדוקציע, און א גרויסע צאל פראפעסיאנאלע ארבעטער, וואס וועט אינאיינעם דאפלען די יעצטיגע פראדוקציע קאפאציטעט און דראסטיש אראפשניידן די צייט וואס עס נעמט צו פראדוצירן די מאטארן. די סאליד-ראקעט מאטארן זענען די מאטארן וואס טרייבן פאראויס מיסילס און אנדערע וואפנס, און דערפאר איז די נאכפראגע פאר זיי געווארן א הויפט פריאריטעט פאר די אמעריקאנער מיליטער.

די פירמע זאגט אז דאס ברענגט די גאנצע פראדוקציע אונטער איין דאך, וואס שפארט איין 80 פראצענט פון די צייט און וועג וואס די טיילן פלעגן דארפן פארן דורכאויס די פראדוקציע פראצעס ביז יעצט. די נייע פעסיליטי איז ערווארטעט זיך צו עפענען שפעטער דעם יאר, און וועט פראדוצירן ראקעט מאטארן פאר די GMLRS ראקעטן סיסטעם אונטער א נייעם 250 מיליאן דאלאר קאנטראקט פון 'לאקהיד מארטין'.

דער נאמען פונעם פאבריק שטימט מיט די "ארסענאל אוו פרידאם" טור פונעם דעפענס סעקרעטאר פיט העגסעט, וועלכער האט באזוכט אין קעמדן אין פעברואר ארויסצוברענגען די וויכטיגקייט פון לאקאלע פראדוקציע פאר די אמעריקאנער זיכערהייט. די קעמדן לאקאציע פון 'על-3-העריס' ציט זיך אויף ארום 2,000 אקער לאנד און גיט ארבעט פאר ארום 1,500 מענטשן, און סערווירט שוין די אמעריקאנער מיליטער און אירע אליאירטע פאר איבער פערציג יאר.

די פירמע אינוועסטירט יעצט ביליאנען דאלארן איבער אירע פארשידענע לאקאציעס צו פארגרעסערן פראדוקציע, און האט געמאלדן אז זיי פלאנען ארויסצוגיין פובליק מיט אן IPO פאר איר ראקעט-מאטאר ביזנעס. דערווייל זענען די צילן פון פראדוקציע בלויז פירמע-שאצונגען, און עס בלייבט איבער צו זען פונקטליך ווען די פלאנט וועט אנהייבן ארבעטן פולשטענדיג און צי זיי וועלן טאקע קענען נאכקומען די ריזיגע נאכפראגע פאר מיסיל מאטארן.