קאליפארניע: אומבאקאנטער שיסער עפנט פייער אויף לאקאלע נייעס סטאנציע צוויי מאל אין בלויז עטליכע טעג

אן אומבאקאנטער באוואפנטער פארשוין אין א קאר האט געעפנט פייער אויף א לאקאלע נייעס סטאנציע אין קאליפארניע, נישט בלויז איין מאל, נאר צוויי מאל אין א קורצע אפשניט פון עטליכע טעג.

דער ערשטער אינצידענט האט פאסירט פרייטאג צונאכטס, דעם 9'טן אקטאבער, אינדרויסן פון די "KBAK/KBFX" סטודיא אויף וועסטווינד דרייוו אין די שטאט בעיקערספילד. אויף די סעקיוריטי קאמערעס קען מען זען ווי א טונקל-קאלירטע קאר שטעלט זיך אפ אינדרויסן, עס זעט זיך אן פייער-בליצן פון א וואפן וואס באלייכט די נאכט, און דערנאך זעט מען ווי די קאר רייסט אפ פונעם ארט. לויט די אויספארשער זענען 10 קוילן אריינגעשאסן געווארן אין א קאנפערענץ צימער און אן אפיס אינעם געביידע.

דערנאך, דינסטאג אינדערפרי, האט זיך די שרעק איבערגעחזר'ט ווען פרישע קוילן האבן געטראפן די סטודיא, און אן ענליכע טונקעלע קאר איז געזען געווארן אין די געגנט. ברוך השם קיינער איז נישט פארוואונדעט געווארן אין קיין איינע פון די שיסערייען, אבער די געביידע האט געליטן שאדנס, אריינגערעכנט א צובראכענע פראנט-פענסטער. עס איז באריכטעט געווארן אז ביי די צווייטע אטאקע זענען געווען ארבעטער אינעווייניג אינעם געביידע.

די "סינקלער" קאמפאני, וועלכע פירט די סטאנציע, האט ארויסגעגעבן א סטעיטמענט זאגנדיג אז זיי זענען טיף באזארגט איבער די צווייטע שיסעריי, צוגעבנדיג אז זיי זענען דאנקבאר אז קיינער איז נישט געשעדיגט געווארן, און האבן אונטערגעשטראכן אז די זיכערהייט פון זייערע ארבעטער איז זייער העכסטע פריאריטעט. די פירמע זאגט אז זיי קאאפערירן פולשטענדיג מיט די בעיקערספילד פאליציי דעפארטמענט, אבער דערווייל איז נאך נישטא קיין פארדעכטיגטער און קיינער איז נאך נישט ארעסטירט געווארן. די פאליציי האט נאך דערווייל נישט קאנפירמירט צי די סטאנציע איז געווען דירעקט געצילט.

די אינצידענטן קומען נאך אן ענליכע אטאקע פאראיאר אויף די סאקראמענטא "ABC" סטאנציע "KXTV", וואס האט דעמאלטס געפירט צו פעדעראלע קלאגעס קעגן א 65-יעריגן מאן. די פאליציי בעט אז ווער עס האט סיי וואספארא אינפארמאציע זאל זיך פארבינדן מיט די בעיקערספילד פאליציי אויף 327-7111 (661). פאר די ארטיגע נייעס אגענטור, וועמענס ארבעט עס איז צו דעקן די נייעס פאר די קאמיוניטי, בלייבט יעצט די גרעסטע פראגע ווער עס שטייט אונטער די שיסערייען, און צי דער פארשוין פלאנירט חלילה נאך אן אטאקע.