בס"ד

ראבאטיקס סטארטאפ 'ריווארד עי-איי' שטעלט פאר א רעוואלוציאנערע מאדעל וואס קאנטראלירט סיי וועלכע ראבאט אן קיין פריערדיגע טרענירונג

די ראבאטיקס סטארטאפ קאמפאני 'ריווארד עי-איי' (Reward AI) איז ארויסגעקומען מיט איר נייע פאונדעישאן מאדעל, אנגערופן OM-1, וואס לויט די קאמפאני קען עס קאנטראלירן כמעט סיי וועלכע ראבאט קערפער אן דעם וואס דער ראבאט זאל בכלל ווערן טרענירט דערויף.

אנשטאט צו נוצן קאמפליצירטע קאנטראל סיסטעמען אדער ספעציפישע דאטא פאר ראבאטן, לערנט זיך די OM-1 סיסטעם אינגאנצן פון מענטשן וואס טוען טעגליכע אקטיוויטעטן בעת זיי טראגן די קאמפאני'ס ספעציעלע סענסאר הענטשקע, די 'אמניבאדי הענד' (Omnibody Hand). די דאטא וואס ווערט געזאמלט פונעם מענטש אליין איז גענוג אז די מאדעל זאל קענען אפערירן פארשידענע סארטן ראבאטן — אריינגערעכנט קליינע טיש-ראבאטן, גרויסע אינדוסטריאלע מאשינען, און פולע מענטשליכע-פארעם ראבאטן.

די קאמפאני האט דעמאנסטרירט ווי די סיסטעם פירט דורך לאנגע און קאמפליצירטע פעולות, ווי צום ביישפיל פאקן טעלעפאנען מיט פיר הענט אויף איין מאל, מישן געטראנקען, צאמלייגן וועש, און אפילו ארויסציען א פארשפארטע אינטערנעט קעיבל. אלעס ווערט געטאן אין ריעל-טיים, מיט א שנעלקייט און פליסיגקייט וואס קומט זייער נאנט צו אן אמת'ן מענטש.

די ספעציעלע הענטשקע איז נישט געבויט געווארן פשוט נאכצומאכן די מענטשליכע האנט, נאר ענדערש אויפצוכאפן די וויכטיגסטע פונקטן פון וויאזוי א מענטש כאפט אן און רוקט זאכן. דאס מאכט אז די טעכנאלאגיע זאל בלייבן נוצבאר אפילו ווען די ראבאטישע הארדווער טוישט זיך כסדר. ווי אויך קען די OM-1 מאדעל קאנטראלירן עטליכע ראבאטן וואס ארבעטן אינאיינעם. די קאמפאני באריכטעט אז זיי האבן באמערקט אינטערעסאנטע רעזולטאטן בעת די ראבאטן ארבעטן צוזאמען, ווי למשל אז איין ראבאט וועט אטאמאטיש פאררעכטן און איבערנעמען אויב דער צווייטער מאכט א טעות.

די מאנשאפט אונטער דעם פראיעקט זענען גאר באקאנט אין די ראבאטיקס אינדוסטריע, האבנדיג פריער געארבעט אויף באוואוסטע פראיעקטן ווי DexCap, HumanPlus און ALOHA. דערווייל אבער בלייבט די OM-1 סיסטעם פריוואט ביי די קאמפאני. זיי האבן נאכנישט ארויסגעגעבן קיין קאוד אדער API פאר די פובליק, אזוי אז דעוועלאפערס פון אינדרויסן קענען עס נאכנישט אויספרובירן אויף זייערע אייגענע מאשינען.