ווארענונגען איבער די וועלט: רעגירונגען פאדערן פון בירגער זיך צוצוגרייטן אויף מעגליכע קריזיסן מיט עסן און וואסער

רעגירונגען איבער אייראפע, אזיע און נארט אמעריקע בעטן אלץ מער פון זייערע בירגער זיך צוצוגרייטן אויף עמערדזשענסי פעלער. נאציאנאלע קאמפיינס רופן פאמיליעס צו האלטן אין שטוב רעזערוון פון עסן, וואסער, קעש און וויכטיגע געצייג.

אין ענגלאנד האט די גאווערנמענט ארויסגעגעבן א "זייט גרייט" (Be Ready) אנווייזונג, וואס רעקאמענדירט צו האלטן גענוג יסודות'דיגע געברויכן צו קענען איבערלעבן פאר אמווייניגסטנס דריי טעג. דאס רעכנט אריין ניין ליטער טרינק-וואסער פער פערזאן, צוזאמען מיט א באטערי-געטריבענע ראדיא און א פלעשלייט. יאפאן גרייט זיך אויך צו בעטן אירע בירגער צו האלטן עמערדזשענסי סופלייס פאר דריי טעג, כאטש א וואך צייט ווערט פאררעכנט אלס מער רעקאמענדירט. ענליכע רופן זענען ארויסגעקומען אין לענדער ווי דייטשלאנד, פראנקרייך, שוועדן, נארוועגיע, פינלאנד, קאנאדע און עטליכע אי.יו. (EU) לענדער. די וואקסנדע צאל פון פובליק קאמפיינס צייגט אויף א ברייטערע טויש אין וויאזוי רעגירונגען קוקן אן נאציאנאלע זיכערהייט און די מעגליכקייט פון לענגערע קריזיסן.

אט איז א ליסטע פון אלע לענדער וואס האבן געהייסן זייערע בירגער זיך צוצוגרייטן: 👇

🇬🇧 ענגלאנד – 3 טעג

🇯🇵 יאפאן – 3 טעג ביז א וואך

🇮🇪 אירלאנד – א ביכל געשיקט צו אלע 2.2 מיליאן שטיבער

🇱🇺 לוקסעמבורג – א 72-שטונדן אנווייזונג פאר יעדע שטוב

🇧🇪 בעלגיע – 72 שטונדן, א 4-יעריגע נאציאנאלע קאמפיין

🇳🇱 האלאנד – 72 שטונדן, א ביכל געשיקט צו 8.5 מיליאן שטיבער

🇫🇷 פראנקרייך – 72 שטונדן

🇩🇪 דייטשלאנד – ביז 10 טעג

🇸🇪 שוועדן – 1 וואך, א קאמפיין אונטערן נאמען "אויב א קריזיס אדער מלחמה קומט"

🇳🇴 נארוועגיע – 1 וואך

🇨🇭 שווייץ – 1 וואך + א שעלטער פלאץ פאר יעדן איינוואוינער

🇫🇮 פינלאנד – 72 שטונדן

🇩🇰 דענמארק – 72 שטונדן

🇵🇱 פוילן – 72 שטונדן, א מלחמה אנווייזונג

🇨🇿 טשעכיי – א 72-שטונדן אנווייזונג פאר יעדע שטוב

🇪🇪🇱🇻🇱🇹 באלטישע לענדער – נאציאנאלע קריזיס אנווייזונגען

🇦🇹🇭🇷 עסטרייך, קראאטיע – עצות וויאזוי צו האלטן רעזערוון

🇹🇼 טייוואן – א נאציאנאלע אנווייזונג פאר נאטורליכע קאטאסטראפעס און אינוואזיעס

🇨🇦 קאנאדע – 72 שטונדן

🇪🇺 די אי.יו. (EU) – האט געהייסן אלע בירגער צו האלטן א 72-שטונדן עמערדזשענסי קיט

די ווארענונגען קומען אין א צייט פון געהעכערטע מיליטערישע און סייבער-זיכערהייט זארגן, וואס לייגט צו נאך א פונקט צום באנייטן פאקוס אויף עמערדזשענסי גרייטקייט. א באריכטעטע פענטאגאן איניציאטיוו, באקאנט אלס "פארטרעס" (FORTRESS), פאדערט אז הויפט אמעריקאנער מיליטערישע באזעס זאלן האלטן די מעגליכקייט צו אפערירן ביז 90 טעג אן זיך דארפן פארלאזן אויף אינדרויסנדיגע עלעקטריק, וואסער, גאז אדער קאמוניקאציע. אין די זעלבע צייט האבן בריטישע פארטיידיגונגס באאמטע אונטערגעשטראכן די וויכטיגקייט פון פארשטארקן די לאנד'ס מיליטערישע גרייטקייט אין ליכט פון וואקסנדע אינטערנאציאנאלע סטראשונגען.

איבער אייראפע האבן רעגירונגען אויסגעטיילט עמערדזשענסי ביכלעך און ארויסגעגעבן רעקאמענדאציעס וואס גייען פון א 72-שטונדן סורווייוואל קיט ביז סופלייס וואס קענען אויסהאלטן א שטוב ביז 10 טעג. באאמטע שטעלן געווענליך אראפ די שריט אלס א צוגרייטונג פאר פארשידענע מעגליכע עמערדזשענסיס, אריינגערעכנט שווערע וועטערס, אינפראסטרוקטור דורכפעלער, סייבער אטאקעס און באוואפנטע קאנפליקטן, ענדערש ווי פאראויסצוזאגן אז א ספעציפישע מלחמה אדער קאטאסטראפע איז אויפן שוועל.

פונדעסטוועגן, ברענגט די פלוצלינגע פארברייטערונג פון די קאמפיינס ארויף א וויכטיגע פראגע: צי לערנען זיך רעגירונגען פשוט וויאזוי צוצוגרייטן זייערע בירגער צו א וועלט וואס ווערט אלץ מער אומפארעכנבאר, אדער זעען זיי אן ערנסטע ריזיקע וואס פשוט'ע בירגער דארפן נעמען מער ערנסט?