בס"ד

דראמאטישע ווידעא: א בריטישע נוקלעארע סובמארין שפאלט אדורך די דיקע אייז אינעם ארקטישן אקעאן צום ערשטן מאל אין א צענדליג יאר

דראמאטישע בילדער און ווידעא זענען פארעפנטליכט געווארן ווי מען זעט די "עיטש-עם-עס טרענטשענט" (HMS Trenchant), א בריטישע נוקלעאר-געטריבענע סובמארין, ווי זי שפאלט אדורך מיט א געוואלדיגע קראפט א קרוב צו איין-מעטער דיקע שיכט פון אייז אינעם 'באפארט ים' אינעם ארקטיק. אינעם ווידעא זעט מען ווי גרויסע שטיקער פונעם געפרוירענעם אקעאן פאלן אראפ פון די סובמארין בעת זי קומט ארויס צו די אפענע לופט.

די פאסירונג איז פארגעקומען דורכאויס די אזוי-גערופענע "אייז עקסערסייז" (ICEX), א מיליטערישע איבונג וואס ווערט אנגעפירט דורך די פאראייניגטע שטאטן יעדע צוויי יאר. די איבונג ברענגט צוזאמען סובמארינען פון אליאירטע לענדער זיך צו פראקטיצירן אין אונטער-אייז נאוויגאציע, אויספרובירן עמערדזשענסי ארויסקומען טעקניקס, און זיך צוגרייטן פאר מלחמה צושטאנדן אין איינע פון די שווערסטע און קעלטסטע קלימאטן אויף די וועלט.

ביי די עקסערסייז ווערט אויך געזאמלט וויכטיגע סייענטיפישע דאטא איבער די עקסטרעמע קעלט, די רוקעדיגע אייז, און די ספעציפישע אקוסטיק אונטערן וואסער - אינפארמאציע וואס איז גאר וויכטיג פאר סיי וועלכע לאנד וואס וויל אפערירן זיכער אונטער די פאלארע אייז. די בריטישע סובמארין האט זיך אנגעשלאסן מיט אמעריקאנער סובמארינען ביי א צייטווייליגע קעמפ וואס איז אויפגעשטעלט געווארן דירעקט אויפן געפרוירענעם אקעאן, ארבעטנדיג אינאיינעם מיט א געמיינשאפטליכע טיעם פון מיליטערישע פערסאנאל און ריסערטשערס ארום די זייגער.

וואס מאכט דעם יעצטיגן מאנעווער אזוי היסטאריש איז דער פאקט אז דאס איז דאס ערשטע מאל אין מער ווי א יארצענדליג וואס א סובמארין פון די 'ראיעל נעיווי' (די בריטישע פלאטע) קומט ארויס דורך די ארקטישע אייז. דאס צייגט אז בריטאניע קערט זיך צוריק צו א מעגליכקייט וואס איז אמאל געווען א הויפט טייל פון נאטא'ס סטראטעגיע אין די ראיאן דורכאויס די קאלטע קריג.

דער ארקטיק ראיאן ווערט אלס מער און מער א קאנטראווערסיאלע און סטראטעגישע פלאץ, וויבאלד די שמעלצנדע אייז עפנט אויף נייע שיפינג רוטס און צוטריט צו נאטורליכע אוצרות. דאס מאכט די מעגליכקייט צו אפערירן שטילערהייט אונטער די אייז פיל מער ווערדפול פאר נאטא מיטגלידער ווי סיי ווען בעפאר.

מיט'ן זיך צוריק אנשליסן אין די ICEX איבונגען, האט די בריטישע פלאטע איבערגעוויזן אז זיי האבן נאך אלץ די קענטעניסן און די שטארקייט וואס פעלט זיך אויס צו קעמפן, נאוויגירן און איבערלעבן אין די שרעקליכע קעלט און טונקלקייט אונטער די פאלארע אייז. די סוקסעספולע מיסיע ווערט באטראכט אלס א וויכטיגע שריט צו קענען עווענטועל שיקן די נעיווי'ס נייערע "עסטוט-קלאס" (Astute-class) סובמארינען אין די זעלבע אומדערבארעמדיגע וואסערן אין די קומענדיגע יארן.