א טעכנאלאגישע דעמאנסטראציע אין צענטער פון איסלאמאבאד, פאקיסטאן, האט גענומען אן אומגעריכטן קער זונטאג, ווען א קאר וואס איז געווארן קאנטראלירט דורך א רימאוט האט זיך ארויסגעגליטשט פון קאנטראל און אריינגעקראכט גלייך אין א געפארקטע פאליציי ווען.

די קאר, א 'סוזוקי אלטא' וואס איז איבערגעמאכט געווארן צו ווערן קאנטראלירט דורך אן אינטערנעט עפפ, איז געווארן פרעזענטירט דורך עהסאן זאפאר אבאסי, א קאמפיוטער אינזשענירינג סטודענט וועלכער ארבעט שוין יארן אויף היימיש-געמאכטע פראיעקטן. א זשורנאליסט מיטן נאמען מוחאמאד אלידזשאה איז געזעצן אינעם פאסאזשיר זיץ און באריכטעט די דעמאנסטראציע פאר זיינע נאכפאלגער, בשעת זאפאר האט קאנטראלירט די קאר פון אינדרויסן דורך זיין סעלפאון.

בלויז עטליכע סעקונדעס נאכדעם וואס דער זשורנאליסט האט זיך אנגערופן מיט שטאלץ אז "פאקיסטאן האט נישט קיין מאנגל אין טאלאנט," האט די סטערינג וויל זיך מיטאמאל פארדרייט און די קאר האט אריינגעקראכט דירעקט אינעם פאליציי קאר.

די ווידיאו פונעם אינצידענט איז שנעל געווארן וויירעל אויף סאשעל מידיא. אינעם קליפ קען מען זען ווי דער זשורנאליסט כאפט זיך ביים קאפ און שלעפט ארויף די הענד-ברעיק אין א לעצט-מינוטיגע פרואוו אפצושטעלן דעם קראך, אבער עס איז שוין געווען צו שפעט. לויט ווי זאפאר אליינס האט שפעטער מסביר געווען, איז דער עקסידענט בכלל נישט געשען צוליב א פראבלעם מיטן קאנעקשאן, נאר א פשוט'ע מענטשליכע טעות. בעת ער האט אויסגעדרייט זיין טעלעפאן צו ווייזן פאר די קאמערע ווי אזוי די עפפ ארבעט, האט ער בטעות געדרוקט דעם קנעפל צו דרייען לינקס אנשטאט רעכטס, וואס האט געשיקט די קאר גלייך אריין אינעם פאליציי ווען.

אנשטאט צו מאכן דערפון א לעגאלע קעיס און ארעסטירן דעם בחור, האט די איסלאמאבאד פאליציי דעפארטמענט געהאנדלט דעם אינצידענט מיט א גוטן מוט. דער פאליציי קאמאנדיר ד"ר איאז כוסעין האט פערזענליך איבערגעקוקט די טעכנאלאגיע און שטודירט די סאפטווער פון זאפאר'ס ערפינדונג, און אים ריינגעוואשן פון סיי וואספארא שולד.

אין א ווידיאו סטעיטמענט האט כוסעין אנגערופן דעם קראך א "גענצליכע טעות" וואס איז פאסירט אינמיטן א לעגיטימע טעסט, און ער האט נישט געפינען קיין שום באווייז פון נאכלעסיגקייט אדער א בייזוויליגע כוונה. אנשטאט אים געבן א טיקעט, האט די פאליציי גאר אויסגעלויבט זאפאר אלס א ביישפיל פון די יונגע טאלאנטן אינעם לאנד, און אים אנגערופן "די צוקונפט פון פאקיסטאן."

פאר זאפאר האט דער קאמישער אינצידענט זיך אויסגעלאזט אלס א געוואלדיגע פובליסיטי. ער האט דערציילט אז ער האט נישט קיין געהעריגע לאבאראטאריע און ער בויט זיינע ערפינדונגען אינדערהיים מיט זייער באגרעניצטע מיטלען. ער האט זיך שטארק באדאנקט פאר די פאליציי פארן קאאפערירן מיט אים און נעמען די צייט צו פארשטיין זיין פראיעקט. וואס האט זיך אנגעהויבן אלס א וויירעל דורכפאל, האט זיך ענדליך אויסגעלאזט אלס א שיינע געשיכטע פון א פאליציי דעפארטמענט וואס האט געקליבן צו שטיצן און מוטיגן א יונגן טאלאנט אנשטאט אים צו באשטראפן.