אמעריקאנער טרעזשערי סעקרעטאר: איראן'ס הויפט אויל טערמינאל איז פוסט און ליידיג א דאנק אמעריקאנער בלאקאדע

דער אמעריקאנער טרעזשערי סעקרעטאר סקאט בעסענט האט ארויסגעשטעלט אויף די 'עקס' פלאטפארמע א "פארדעם און נאכדעם" בילד, וואס צייגט ווי די ריזיגע אויל טאנקערס וואס פלעגן אנפילן איראן'ס הויפט אויל טערמינאל אויפן 'כארג אינזל' זענען אינגאנצן פארשוואונדן געווארן. ער האט אנגערופן דעם אינזל א "מאנומענט" צו די איינציגסטע זאך וואס דער איראנער רעזשים קען נאך פראדוצירן, וואס ער האט באצייכנט אלס א "דורכפאל".

לויט בעסענט, טוט די אמעריקאנער אפעראציע, באקאנט אלס "אפעראציע עקאנאמישע אויסוואורף" (Operation Economic Outcast), אפשניידן דעם רעזשימס הויפט לעבנס-ליניע פון אויל. דאס האלט אפ דאס געלט פון גיין פאר טעראריזם, נוקלעארע פראגראמען, און די רייכע לעבנסשטייגער פון די 'רעוואלוציאנערע גווארדיע' (IRGC) פירער.

זיין באהויפטונג ווערט געשטיצט דורך אומאפהענגיגע דאטא. אן אנאליז דורך 'בלומבערג' פון שיף-טרעקינג דאטא און סעטעלייט בילדער פונעם אייראפעאישן פאראיין צייגט, אז קיין איין טאנקער האט נישט געאנקערט ביים כארג עקספארט טערמינאל זינט ענדע אוגוסט. דאס איז די לענגסטע צייט אפשניט אן קיין אקטיוויטעט אויפן אינזל זינט די אמעריקע-איראן מלחמה האט אויסגעבראכן אין פעברואר. געווענליך גייט אדורך דעם כארג אינזל ארום 90 פראצענט פון איראן'ס אויל עקספארט.

דער דרוק אויף איראן בויעט זיך שוין פאר עטליכע מאנאטן. אמעריקע האט ארויפגעלייגט א בלאקאדע אויף איראנער אויל עקספארטן זינט האלב אפריל, ארויפגעשטעלט שווערע סאנקציעס אויף ביזנעס פראטנערס פון טעהראן, און אפילו באמבארדירט איראנער טאנקערס נעבן כארג אלס רעאקציע צו איראנער מיסיל אטאקעס אויף אמעריקאנער קריגס-שיפן.

באריכטן צייגן אז די איראנער וואלוטע קראכט און אינפלאציע פליט אין די הימלען. בעסענט זאגט אז די אגרעסיווע אויפפירונג פונעם רעזשים באשטראפט דעם פשוט'ן איראנער בירגער. טראץ דעם אלעם, זענען דא אנאליסטן וואס צווייפלען צי דער עקאנאמישער דרוק אליינס וועט ברענגען אן ענדע צום קאנפליקט. זיי ווייזן אן אויף די הויכע ענערגיע פרייזן איבער די וועלט, די איבערגעריסענע שיפס-רוטעס אינעם 'הארמוז דורכגאס', און באריכטן אז איראן הייבט אן נוצן טרוקעניש-רוטעס זיך ארויסצודרייען פון די בלאקאדע.

די גרויסע פראגע יעצט איז, ווי לאנג טעהראן קען נאך דערהייבן דעם ווייטאג, און צי זיי וועלן טוישן זייער ריכטונג אדער זיך נאר מער איינרייסן און אנגיין מיט זייער עקשנות.