שוידערליכע טראגעדיע: א יונגע פארפאלק אומגעקומען אין א העליקאפטער קראך אין גריכנלאנד

א שרעקליכע טראגעדיע האט פאסירט מאנטאג אויפדערנאכט אויפן גריכישן אינזל 'סיפנאס', ווען א פריוואטע העליקאפטער האט געקראכט און אויפגעריסן אין פלאמען, איבערלאזנדיג טויט א יונגע בריטישע פארפאלק וועלכע האבן געהאלטן אינמיטן זייער האנימון, אינאיינעם מיטן פילאט.

די צוויי, אלעקסאנדער קראמי און מערי עבערט, זענען געפארן אויף א פריוואטע 'בעלל 206' העליקאפטער געטריבן דורך דעם פילאט דזשארדזשוס רייקאס. דער קראך האט פאסירט הארט נעבן דעם לאנדונגס-פלאץ אין טאלאס, ווען די העליקאפטער איז אראפגעפאלן און גלייך אויפגעריסן אין א פייער. עמערדזשענסי רעטונגס קרעפטן, אינאיינעם מיט הילף פון א דערנעבנדיגע אינזל 'סיראס', זענען שנעל אראפגעקומען צום סצענע, אבער האבן ליידער געמוזט באשטעטיגן דעם טויט פון אלע דריי פאסאזשירן. צום גליק איז קיינער אויף דער ערד נישט געשעדיגט געווארן, טראץ וואס דער קראך האט פאסירט נאנט צו א וואוין געגנט.

די העליקאפטער האט זיך געהויבן פון די מארקאפאולא געגנט נעבן אטען און איז געווען אויפן וועג קיין סיפנאס. דער אינצידענט האט פאסירט בלויז עטליכע מינוט בעפאר די געפלאנטע לאנדונג. לאקאלע איינוואוינער האבן איבערגעגעבן אז זיי האבן געהערט מאדנע גערוישן פונעם העליקאפטער רעכט בעפאר עס האט געקראכט, וואס האט געפירט די גריכישע אויטאריטעטן צו עפענען אן אויספארשונג מיט א פאקוס אויף א מעגליכע מעכאנישע דורכפאל. דער פילאט איז געווען אן איבערגעגעבענער און שטארק-ערפארענער געוועזענער אפיציר אין די גריכישע עיר-פארס, וואס מאכט דעם קראך נאך מער שאקירנד. פייערלעשער האבן געארבעט א לענגערע צייט צו פארלעשן די פלאמען און דעם שווערן רויך וואס האט זיך געהויבן פונעם חורבן.

קראמי האט געארבעט אלס א ווייס-פרעזידענט ביי די באקאנטע 'בלעקסטאון' פירמע, וועלכע האט ארויסגעגעבן א סטעיטמענט אויסדרוקנדיג זייער טיפסטן צער אויפן פארלוסט פון א באליבטן קאלעגע. פריינט און באקאנטע זענען געבליבן צעבראכן און שאקירט פון די פלוצלינגדיגע טראגעדיע וואס האט איבערגעריסן דאס לעבן פונעם יונגן פארפאלק, און די געשיכטע האט ארויסגערופן טיפע מיטגעפיל איבער גאנץ ענגלאנד און גריכנלאנד.

די אויטאריטעטן זעצן פאר צו פארשן די אומשטענדן פונעם קראך, אריינגערעכנט דאס איבערקוקן די פלי-דאטן, מעינטענענס רעקארדס, און עדות'שאפטן פון די מאדנע קלאנגען וואס מ'האט געהערט בעפארן קראך, כדי צו דערגיין די פונקטליכע אורזאך פון די שרעקליכע פאסירונג.