ענווידיע צייגט פרישע פארשריט אין ראבאטיקס: צוויי 'הומאנויד' ראבאטן ארבעטן אינאיינעם צוצושטעלן פאפקארן

די טעכנאלאגיע ריז 'ענווידיע' (NVIDIA) האט געמאכט נאך א ריזיגן שריט פאראויס אין די וועלט פון פראקטישע 'הומאנויד' ראבאטיקס, ווען זיי האבן דעמאנסטרירט וויאזוי צוויי "Unitree G1" ראבאטן ארבעטן אינאיינעם צוצוגרייטן און סערווירן פאפקארן, ניצנדיג זייער נייעם "GR00T 2 Turbo" מאדעל.

אין די דעמאנסטראציע קען מען זען ווי איין ראבאט אפערירט די פאפקארן מאשין, שעפט ארויס די פאפקארן און פילט אן די קאפס, בעת דער צווייטער ראבאט נעמט אויף די אנגעפילטע קאפס אויף א ספעציעלע טאץ וואס איז באפעסטיגט אויף זיין ברוסטקאסטן, און טראגט עס דערנאך אוועק. די געמיינזאמע ארבעט ברענגט ארויס די פעאיגקייט פון די ראבאטן צו קאמבינירן באוועגונגען, האנדלען מיט חפצים און זיך צעטיילן מיט אויפגאבעס, אנשטאט בלויז טון איין אקציע אויף אן איסאלירטן אופן.

דער "GR00T 2" מאדעל פון ענווידיע, וואס איז געמאלדן געווארן דעם 9'טן נאוועמבער 2026, איז א ספעציעלע סיסטעם וואס איז דיזיינט צו העלפן ראבאטן פארשטיין זייער ארומיגע סביבה און דורכפירן פיזישע אויפגאבעס, דורך זיך לערנען פון ווידעאס ווי מענטשן טוען עס און פון אנדערע ראבאטישע דאטא. לויט די ספעסיפיקאציעס וואס די קאמפאני האט ארויסגעגעבן, קען די סיסטעם דעגרייכן א 95% סוקסעס ראטע אויף נייע אויפגאבעס נאכן זען בלויז פינף דעמאנסטראציעס און אריבערגיין ארום 30 מינוט פון טרענירונגען. דער סיסטעם לויפט אויפן "Jetson Thor" קאמפיוטינג פלאטפארמע פון ענווידיע, און דער טערבא מאדעל קען רעאגירן אין ריעל-טיים מיט א שנעלקייט פון ארום 124 מיליסעקונדעס.

די דעמאנסטראציע גיט א בליק וויאזוי די סארט ראבאטן וועלן עווענטועל קענען ווערן א טייל פון טעגליכע סערוויס אפעראציעס, בפרט אין רעסטוראנטן, טעאטערס, אמוזיר-פארקן און אנדערע ביזנעסער וואס סערווירן קאסטומערס. אנשטאט זיך צו פארלאזן אינגאנצן אויף מענטשליכע ארבייטער פאר איבערגעחזר'טע ארבעט, וועלן ביזנעסער מעגליך קענען איינשטעלן א שטאב פון ראבאטן צו באהאנדלען עסן-צוגרייטונגען, דעליוועריס און רוטינע סערוויסעס. די מעגליכקייט פון צוויי ראבאטן זיך צו צעטיילן מיט די ארבעט און קאאפערירן אינאיינעם פאר א געמיינזאמע ציל איז גאר א וויכטיגע דערגרייכונג, וויבאלד אין אן עכטע ארבעטס-פלאץ פעלט זיך אפט אויס אז עטליכע מאשינען זאלן ארבעטן אינאיינעם אינעם זעלבן סביבה. ענווידיע'ס צוגאנג צילט אויך צו רעדוצירן די צייט וואס עס נעמט צו טרענירן די ראבאטן פאר נייע, אומבאקאנטע אויפגאבעס.

פונדעסטוועגן, דאס אז עס ארבעט גוט אין א קאנטראלירטע סביבה מיינט נאכנישט אז די טעכנאלאגיע איז שוין גרייט פאר ברייטע קאמערציאלע באנוץ. עס זענען נאך דא וויכטיגע טשאלענדזשעס וואס מען דארף איבערקומען, ווי למשל זיכערהייט, פארלעסליכקייט, אפערירן-קאסטן, און וויאזוי די ראבאטן וועלן זיך אומגיין מיט אומפארראויסגעזעענע קאסטומער אינטעראקציעס. דאך צייגט די פאפקארן דעמאנסטראציע וויאזוי די פארשריט אין פיזישע AI קען ברענגען הומאנויד ראבאטיקס נענטער צו פראקטישע באנוץ אין די טעגליכע לעבן, ארויס פון די פאבריקן און ריסערטש לאבאראטאריעס.