דראמאטישע ווידעא: אראבישער רעפארטער קוים אנטלאפן מיט'ן לעבן ווען א חוטי מיסיל פאלט הארט נעבן אים בעת א לייוו בראדקעסט אין תימן

דער 'על אראביע' קארעספאנדענט, מוחאמעד על-אשקאר, האט פונקט געענדיגט זיך אנגרייטן פאר א 'לייוו בראדקעסט' נעבן דעם באב על-מאנדעב דורכגאס אין תימן, ווען א מיסיל געשאסן דורך די חוטי רעבעלן האט אויפגעריסן הארט נעבן אים, פארוואנדלנדיג א רוטינע נייעס באריכט אין א שוידערליכע 76-סעקונדע איבערלעבעניש.

אין די דראמאטישע ווידעא קען מען זען ווי על-אשקאר שטייט אויף א הייוועי אנגעטון מיט זיין פולע פרעסע געצייג און א מייקראפאן אין די האנט, ווען מיטאמאל הערט זיך א מעכטיגע אויפרייס אונטער אים, און א ריזיגע וואלקן פון שטויב און רויך הייבט זיך ארויף אין די לופטן. די קאמערע האט ווייטער געכאפט די בילדער דורכאויס די כאאס, און האט רעקארדירט די ערשטע מאמענטן נאכ'ן אויפרייס וואס האט אויפגעטרייסלט דעם גאנצן ארום פונעם זשורנאליסט און זיין קרו.

די אטאקע איז געקומען אין די צייט וואס די חוטי קראפטן האבן געשאסן מיסילס צום דורכגאס, א ברעג וואו על-אשקאר האט באריכטעט אינאיינעם מיט די תימן'ער רעגירונג קראפטן. דער אינצידענט קומט אינמיטן א גרויסע עסקאלאציע אין די שלאכטן ארום באב על-מאנדעב, וואס איז איינע פון די וועלט'ס מערסט סטראטעגישע וואסער-וועגן. דארט פירן די סאודי-געשטיצטע תימן'ער רעגירונג קראפטן אן א ברייטע אפענסיווע צוריקצוכאפן קאנטראל פונעם ברעג פון די איראן-געשטיצטע חוטיס.

דער אינצידענט דינט אלס א שארפע דערמאנונג ווי געפארפול עס איז געווארן פאר זשורנאליסטן וואס דעקן דעם קאנפליקט, ווען רעפארטערס טרעפן זיך כסדר אין א סכנה בשעת די חוטיס האלטן אין איין צילן סטראטעגישע פאזיציעס ביים רויטן ים. על-אשקאר איז נישט דער ערשטער קארעספאנדענט וואס געפינט זיך אונטער פייער ביים באריכטן פונעם שטח, און די נייע ווידעא פארשפרייט זיך שוין גאר שנעל אלס א לעבעדיגע ביישפיל פון די ריזיקעס וואס מלחמה קארעספאנדענטן נעמען איין בלויז פאר'ן טון זייער דזשאב. דערווייל האלטן ביידע זייטן — די רעגירונג און די חוטיס — אין איין טענה'ן ווער עס האט די אויבערהאנט ביי דעם קריטישן ברעג.