סאודי אראביע גיט ארויס א זיכערהייט ווארענונג: איינוואוינער ווערן געהייסן נישט צו פילמען די הוטי מיסל אינטערסעפשנס
גאלערי
ווידעאס
סאודי אראביע ווארנט בירגער: פילמירט נישט קיין מיסיל אטאקעס און לופט-פארטיידיגונג אינטערסעפשאנס
די פובליק סעקיוריטי אטאריטעטן אין סאודי אראביע האבן ארויסגעגעבן א פרישע ווארענונג, אין וועלכע זיי בעטן די בירגער און איינוואוינער נישט צו פילמירן, פובליצירן אדער טיילן קיין בילדער און ווידעאוס פון אריינקומענדיגע מיסילס, דראון אטאקעס, אדער ווי די לופט-פארטיידיגונג סיסטעמען שיסן זיי אראפ.
אין א ווידעא וואס איז ארויסגעשטעלט געווארן אינאיינעם מיט די ווארענונג, זעט מען ווי א פערזאן רעקארדירט ביינאכט מיסיל אקטיוויטעטן אויף זיין סעלפאן, און דערנאך ווערט מסביר געווען וויאזוי אזעלכע ווידעאוס קענען שטעלן די נאציאנאלע זיכערהייט אין א סכנה. די אטאריטעטן ווארענען אז די בילדער און ווידעאוס קענען אנטפלעקן סענסיטיווע לאקאציעס, ארויסגעבן פאטענציעלע צילן פארן פיינט, און צושטעלן אינפארמאציע פאר פיינטליכע קרעפטן וואס קען זיי העלפן אפשאצן ווי גוט די סאודישע עיר-דעפענס ארבעט. אפילו אומשולדיגע דעטאלן אין א ווידעא, ווי ארומיגע געביידעס און געאגראפישע צייכנס, קענען ארויסגעבן פונקטליך וואו די אינטערסעפשאן איז פארגעקומען.
די ווארענונג לייגט א שטארקן דגש אז ווער עס פובליצירט אדער טיילט אזעלכע מאטעריאלן קען אויסשטיין שטרענגע לעגאלע קאנסעקווענצן אונטער די סאודישע געזעצן. די איינוואוינער ווערן געבעטן צו פאלגן די אפיציעלע אינסטרוקציעס און באריכטן סיי וועלכע פארדעכטיגטע אקטיוויטעטן אדער זיכערהייט אינצידענטן דירעקט צו די אטאריטעטן, אנשטאט עס ארויפצולייגן אויף סאשעל מידיא.
די ווארענונג קומט אין א צייט פון אנגעצויגנקייט און א פרישע כוואליע פון מיסיל און דראון אטאקעס דורך די האוטי רעבעלן, וועלכע צילן פארשידענע לאקאציעס איבער סאודי אראביע. דעם 18'טן נאוועמבער האבן די סאודישע אטאריטעטן ארויסגעשיקט עמערדזשענסי אלערטס פאר עטליכע שטעט אין דרום פונעם לאנד, נאכדעם וואס די סאודי-געפירטע קאאליציע האט באריכטעט אז זיי האבן אראפגעשאסן א האוטי קרוז מיסיל וואס איז געווען געצילט קיין ריאד. די האוטיס האבן אויך געמאכט פרישע קלעימס איבער אטאקעס אויף סאודישע איינריכטונגען, וואס זענען דערווייל נישט באשטעטיגט געווארן דורך אפיציעלע קוועלער.
פריערדיגע ווארענונגען פונעם סאודישן אינערן מיניסטעריום און ציווילע פארטיידיגונג האבן ענליך פארבאטן דאס פובליצירן בילדער און ווידעאוס פון אינטערסעפשאנס אדער פון די ערטער וואו די מיסילס זענען געפאלן. די באגרעניצונגען האבן אויך געצויגן די אויפמערקזאמקייט פון אויסלענדישע דיפלאמאטישע מיסיעס, אריינגערעכנט די אינדישע אמבאסאדע, וועלכע האט געבעטן אירע בירגער אין לאנד זיך צו האלטן צו די לאקאלע געזעצן.
די הויפט זיכערהייט זארג איז, אז ווידעאוס וואס ווערן געטיילט פובליק קענען געבן פאר די פיינט 'ריעל-טיים' שפיאנאזש אינפארמאציע איבער די פארטיידיגונג פאזיציעס, אינטערסעפשאן לאקאציעס און ווי עפעקטיוו די מיליטערישע רעאקציעס זענען. דערפאר בעטן די סאודישע אטאריטעטן אז מ'זאל באריכטן אינצידענטן בלויז דורך אפיציעלע קאנאלן, וואס איז א וויכטיגע טייל פון באשיצן דעם לאנד'ס זיכערהייט.