היסטאריש און דראמאטיש: דער 'פארט הוד' טעראריסט וועט הינגעריכט ווערן דורך א 'פייערינג סקוואד' אין א פובליק לייוו-סטרים

דער אמעריקאנער פארטיידיגונגס סעקרעטאר, פיט העגסעט, האט באשטעטיגט אז נידאל כאסאן, דער געוועזענער ארמיי מעידזשאר וועלכער האט אומגעברענגט 13 מענטשן און פארוואונדעט נאך 32 ביי די שוידערליכע 'פארט הוד' שיסעריי אין יאר 2009, וועט הינגעריכט ווערן דורך א 'פייערינג סקוואד' (שיסעריי-אפטיילונג) אין א פובליק לייוו-סטרים וואס די גאנצע וועלט וועט קענען מיטפאלגן.

רעדנדיג אויפ'ן מיליטערישן שיף 'יו-עס-עס אברהם לינקאלן', האט העגסעט אנגערופן דעם באשלוס אלס א זעלבסטפארשטענדליכע שריט, זאגנדיג אז די זעלנער דארפן זען אז עס זענען דא ערנסטע קאנסעקווענצן פאר א ראדיקאלע איסלאמישע אטאקע וואס ווערט דורכגעפירט פון אינעווייניג אין די אייגענע רייען. כאסאן, א פסיכיאטער אין די ארמיי, האט געעפנט פייער אויף זיינע מיט-זעלנער שרייענדיג "אלאהו אכבאר". ער האט שפעטער געזאגט אז די אטאקע איז געווען געצילט אפצושטעלן אמעריקאנער טרופן פון גיין קעמפן קעגן די טאליבאן און אל קאידא. ער איז געבליבן פאראליזירט נאכדעם וואס אן אפיציר האט אים געשאסן ביי זיין ארעסט.

פרעזידענט טראמפ האט שוין באשטעטיגט העגסעט'ס רעקאמענדאציע. די הינריכטונג איז באשטימט געווארן אויף דעצעמבער 3, 1:00 אזייגער נאכמיטאג, אויף די זעלבע 'פארט הוד' באזע און כמעט אין די זעלבע שעה וואס די אריגינעלע אטאקע איז פארגעקומען. דאס וועט זיין די ערשטע מאל וואס די אמעריקאנער מיליטער נוצט א פייערינג סקוואד זינט יאר 1945, ווען דער ארמיי זעלנער עדי סלאוויק איז הינגעריכט געווארן פאר'ן דעזערטירן. די פענטאגאן זאגט אז די הינריכטונג וועט ווערן געסטרימט פובליק, א זאך וואס דאס מיליטער האט נישט געטאן פאר לאנגע דורות.

דער פלאן האט שוין ארויסגערופן שארפע קריטיק פון געזעצגעבער פון ביידע פארטייען, וועלכע פרעגן צי דאס בראדקעסטן א טויט-שטראף מאכט נישט פונעם יוסטיץ סיסטעם א טעאטער-שפיל. לעגאלע עקספערטן ווייזן אויך אן אז כאסאן קען נאך אריינגעבן א פעטיציע אין געריכט וואס קען אפציען און פארהאלטן דעם פראצעדור.

דערווייל האט די פענטאגאן נאכנישט ארויסגעגעבן קיין פונקטליכע דעטאלן ווי אזוי דער פובליק וועט קענען מיטפאלגן דעם לייוו-סטרים, און באאמטע געבן צו אז די ארמיי רעגולאציעס האבן דערווייל נישט קיין אוועקגעשטעלטע פראצעדור ווי אזוי דורכצופירן א פייערינג-סקוואד הינריכטונג. טראץ דעם אלעם, שטייט העגסעט פעסט אונטער זיין באשלוס, ארויסברענגענדיג אז דאס איז א דירעקטע און פובליקע יוסטיץ-שריט פאר איינע פון די טויטליכסטע אטאקעס וואס איז נאר אמאל דורכגעפירט געווארן אויף אן אמעריקאנער מיליטערישע באזע.