מאסיווע ערד-גליטש אין עקוואדאר: א גאנצע בארג איז איינגעפאלן און האט בלאקירט א טייך מיט אן 8-מעטער הויפענונג פון בלאטע
גאלערי
ווידעאס
בס"ד
מאסיווע ערד-זעצונג אין עקוואדאר בלאקירט א הויפט טייך און ברענגט שווערע זארגן איבער מעגליכע פארפלייצונגען
א ריזיגע ערד-זעצונג (לענדסלייד) אין די שטאט אלאוסי אין עקוואדאר האט אראפגעברענגט א גאנצע טייל פון א בארג גראד אריין אין א טאל, וואס האט גענצליך בלאקירט דעם ארטיגן 'אלאוסי טייך' און אלארמירט די לאקאלע אויטאריטעטן איבער א מעגליכע קאטאסטראפאלע פארפלייצונג.
דער דראמאטישער אינצידענט האט פאסירט דעם פארגאנגענעם נאוועמבער 18 אין די 'לא פרימאווערא' סעקטאר פון די טשימבאראזא פראווינץ, ווען א מאסיווע שטיק פון ערד און פעלזן-שטיינער האט זיך פלוצלינג אפגעריסן פונעם בארג און אראפגעקראכט ארום 500 מעטער צו די טייך אונטן. די ברוכווארג האט אינגאנצן פארשטאפט א טייל פונעם וואסער-וועג וואס איז ארום 66 מעטער ברייט, און האט באשאפן א נאטורליכע דאמבע וואס ווערט געשאצט צו זיין צווישן זעקס און אכט מעטער הויך. שרעקעדיגע ווידעא קליפס וואס צירקולירן אויפן אינטערנעט צייגן דעם פחד'דיגן מאמענט ווי דער בארג פאלט איין, שיקנדיג אומגעהויערע קוואנטומס פון זאמד און שטיינער קראכן אריין אינעם טייך.
די פלוצלינגדיגע בלאקאדע האט געפירט דערצו אז דאס וואסער זאל זיך אנהייבן אנזאמלען אונטער די ברוכווארג, וואס האט געברענגט די לאקאלע אויטאריטעטן צו אקטיוויזירן עמערדזשענסי שריט און אנהייבן מאניטארירן די סיטואציע. די אפעקטירטע געגנט געפינט זיך נעבן די אלאוסי-פועבלא וויעדזשא גאס, וואס איז תיכף פארמאכט געווארן אלס א פראקאוציע בשעת באאמטע האבן אונטערזוכט די סטאביליטעט פונעם שטח.
באאמטע האבן געווארנט אז די אומסטאבילע בארג און דאס אנגעזאמלטע וואסער קען ברענגען פרישע סכנות, בפרט אויב שווערע רעגנס וועלן פארמערן דעם שטראם פונעם טייך אדער אומסטאביליזירן די ניי-געשאפענע דאמבע. עמערדזשענסי פערסאנאל, שטאטישע ארבייטער און דיזעסטער-מענעדזשמענט באאמטע זענען אראפגערופן געווארן אויפן סצענע צו קאארדינירן די ארבעט פון פארמינערן דעם וואסער-דרוק. ארבייטער האבן שוין אנגעהויבן אוועקצוקלינען די מאטעריאלן מיט ספעציעלע עקוויפמענט וואו די אומשטענדן ערלויבן עס, אינדערצייט וואס די אויטאריטעטן האלטן א נאנטע אויג אויפן טייך און די ארומיגע בערג.
איינוואוינער, ספעציעל די וואס וואוינען אראפציר פונעם טייך, זענען געווארנט געווארן צו בלייבן וואך, זיך נישט דערנענטערן צום בלאקירטן טייך, און פאלגן די אפיציעלע זיכערהייט אנווייזונגען.
דער אינצידענט האט אויפגעוועקט פרישע פחדים ביי די איינוואוינער אין אלאוסי, וואו א שרעקליכע ערד-זעצונג אין מערץ 2023 האט איבערגעלאזט 68 טויטע און חרוב געמאכט צענדליגע הייזער קוים צוויי קילאמעטער ווייט פון דעם יעצטיגן קראך. כאטש עס זענען ברוך השם נישט באריכטעט געווארן קיין פאטאליטעטן אדער פארוואונדעטע אינעם יעצטיגן אינצידענט, זענען די אויטאריטעטן נאך אלס שטארק באזארגט אז פרישע ערד-רירונגען אדער א פלוצלינגדיגע אויסברוך פונעם אנגעזאמלטן וואסער קען שטעלן אין א סכנה די קאמיוניטיס אראפציר פונעם טייך.