דראמאטישע רעטונג אפעראציע: א מאסיווע פייער ברעכט אויס אויף א גריכישע פראכט-שיף; אלע 29 מענטשן געראטעוועט

גריכנלאנד. – א מעכטיגע פייער האט פרייטאג אינדערפרי ארומגענומען די גריכישע פראכט-שיף "בלו קעריער 2" בעת זי איז געפארן צפון פון די אינזל מיקאנאס, וואס האט געצווינגען אלע 29 מענטשן אויפן שיף זיך צו ראטעווען דאס לעבן און עס פארלאזן.

די פלאמען זענען צום ערשט באמערקט געווארן ארום 8:57 אינדערפרי לאקאלע צייט. לויט ערשטע באריכטן האט די פייער זיך אנגעהויבן פון א טראק וואס איז געווען געפארקט אין איינע פון די גאראדזשן פונעם שיף, און פון דארט האט זיך עס זייער שנעל פארשפרייט איבער די גאנצע דעק. די שיף, וואס ווערט אנגעפירט דורך די "בלו סטאר פעריס" פירמע און איז געווען אויפן וועג פון פירעוס קיין סאמאס, איז געווען אנגעפילט מיט 166 טראקס און 29 קארס.

ווידעא קליפס פון א דערנעבנדיגע רעטונגס-שיף האבן געוויזן שווערע שווארצע רויעך און מאסיווע פלאמען ארויסקומען פונעם שיף, בשעת די מאנשאפט מיטגלידער האבן צוגעזען די פייער אנגעטון מיט לייף-וועסטס. אלע 28 מאנשאפט מיטגלידער און דער איינציגסטער טראק דרייווער זענען ברוך השם סוקסעספול עוואקואירט געווארן אין רעטונגס-שיפלעך און זענען שפעטער אריבערגעפירט געווארן צום אינזל טינאס. די פירמע האט באשטעטיגט אז יעדער איז אין א גוטן געזונט צושטאנד און קיינער איז נישט פארוואונדעט געווארן.

די גריכישע אויטאריטעטן האבן אונטערגענומען א ברייטע עמערדזשענסי אפעראציע, ארויסשיקנדיג קאוסט גארד פאטראל שיפלעך, פייער שיפלעך און שלעפ-שיפן צו קעמפן מיטן פייער און פארמיידן אן ענווייראמענטאלע קאטאסטראפע. די לאקאלע קאוסט גארד האט אנגעפירט מיט די עוואקואציע אינאיינעם מיט אנדערע קאמערציאלע שיפן אין די געגנט וועלכע האבן זיך אנגערופן צום הילפס-רוף. די וועטער אומשטענדן זענען געווען פארהעלטנמעסיג רואיג, וואס האט שטארק ארויסגעהאלפן די פייערלעשער צו קאנטראלירן די פלאמען אז עס זאל זיך נישט ארויסגליטשן פון קאנטראל.

די פונקטליכע אורזאך פונעם פייער ווערט נאך אויסגעפארשט, אבער דער אינצידענט לייגט זיך צו צו א רייע ענליכע פייערן וואס האבן לעצטנס פאסירט אויף די עלטערע גריכישע פראכט-שיפן. דאס וועקט אויף פרישע פראגעס און זארגן איבער די זיכערהייט סטאנדארטן אויף די שיפן וואס פירן טעגליך אריבער הונדערטער טראקס און קארס צווישן די יבשה און די אינזלען.