סינגאפור: ערשטע פול-סייז ראבאט קאמף פארמעסט ציט צו זיך הונדערטער צושויער

סינגאפור האט די וואך געהאסט איר ערשטע פול-סייז "היומענאיד ראבאט" קאמף פארמעסט אינעם '*SCAPE' צענטער, וואו צוויי מאשינען האבן זיך געשלאגן אויף א סטעידזש, בשעת זיי האבן פונקטליך נאכגעמאכט די לייוו באוועגונגען פון זייערע מענטשליכע פיילאטן וועלכע זענען געווען אנגעטוהן מיט ספעציעלע סוטס וואס כאפן אויף יעדע ריר.

דער פארמעסט האט אריינגענומען דעם לייכטערן 'Unitree G1' ראבאט, וואס וועגט בלויז 35 קילאגראם, קעגן דעם שווערערן 'EngineAI T800' וואס וועגט 75 קילאגראם און האט געמאכט זיין ערשטע דעביוט אין סינגאפור ביי דעם איווענט. פראפעסיאנאלע מארשעל ארטס קעמפער האבן קאנטראלירט די ראבאטן אונטער די 'ARC' ראבאט קאמף ליגע. דער פארמעסט איז געווען אויסגעשטעלט אין א טיעם פארמאט, וואו יעדע זייט האט געהאט איינס פון די צוויי ראבאט מאדעלן, צווינגענדיג די פיילאטן זיך צוצופאסן צו די כוחות און שוואכקייטן פון זייערע מאשינען.

איבער 380 צושויער האבן זיך פארזאמלט אינעם זאל דורכאויס די באקאנטע 'F1' וואך, צו מיטהאלטן ווי די פיילאטן טיילן קלעפ, בריקן און קאנטער-אטאקעס, וואס די ראבאטן האבן נאכגעמאכט מיט אן אומגלויבליכע פינקטליכקייט און כמעט אן קיין שום דילעי. די ספעקטאקל האט פארוואנדלט א טעכנישע דעמאנסטראציע אין א הויכע-ענערגיע ענטערטעינמענט שאו, און דער עולם האט געשריגן פון עקסטאז ווען די ראבאטן האבן זיך אנגעכאפט און אראפגעווארפן איינער דעם צווייטן.

איינע פון די הויכפונקטן פונעם אוונט איז געווען ווען א פיילאט האט זיך אראפגעבויגן און געגעבן א קאנטער-אטאקע וואס האט אראפגעווארפן דעם קעגנערישן ראבאט צו דער ערד, וואס האט ארויסגערופן די גרעסטע אפלאדיסמענטן פונעם עולם. אויף גרויסע סקרינס האט מען געקענט זען א 'ספליט-סקרין' וואס האט געגעבן די מעגליכקייט פאר די צושויער צו פארגלייכן די באוועגונגען פון די מענטשליכע קאנטראלירער מיט די אקציעס פון די ראבאטן אין ריעל-טיים, וואס האט ארויסגעברענגט די פולקאמע פארבינדונג צווישן דעם פיילאט און די מאשין.

די ארגאניזירער האבן אראפגעלייגט דעם איווענט אלס א פובליק 'סטרעס טעסט' פאר די פארגעשריטענע היומענאיד טעכנאלאגיע, אויפצוווייזן אז טעלע-אפעראציע קען דעליווערן א פליסיגע און קאמף-גרייטע פערפארמענס פארנט פון א לייוו אוידיענץ. דער איווענט האט אונטערגעשטראכן ווי ווייט די טעכנאלאגיע אן קיין דילעי איז געגאנגען, ערלויבנדיג פאר קעמפער צו טראנספערירן זייערע טעקניקס דירעקט אויף מעכאנישע קערפערס. דאס האט געגעבן א קלארן בליק וויאזוי ספארט און נייע טעכנאלאגיע קענען זיך צוזאמטרעפן אויף איין סטעידזש.