נס ביים קראך: א העליקאפטער האט זיך צעשמעטערט נאכדעם וואס דער אינסטראקטאר האט פארלוירן קאנטראל אויף א סעקונדע

די 'נעשאנאל טראנספארטעישאן סעיפטי באורד' (NTSB) האט ארויסגעגעבן זייער אויספארשונג איבער א שרעקליכע העליקאפטער קראך וואס האט פאסירט דעם פארגאנגענעם מאי 23 ביים 'סידער סיטי' רעגיאנאלע עירפארט. לויט דעם באריכט, האט דער קראך פאסירט בלויז ווייל דער פלי-אינסטראקטאר האט זיך אויסגעשטרעקט אינמיטן שוועבן אין די לופטן צו אנדרייען א קנעפל אינעם קאקפיט, און דורכדעם פארלוירן קאנטראל.

דראמאטישע סעקיוריטי ווידעא וואס די NTSB האט ארויסגעגעבן צייגט ווי דער רויטער 'בעל 206' העליקאפטער הייבט זיך אויף, און קראכט פלוצלינג אראפ אויפן ראנוועי מיט א געוואלדיגע קראפט, זיך גליטשנדיג ווילדערהייט פונעם אכפאלט. דער קראך איז געווען אזוי שטארק אז די וויידל פונעם העליקאפטער און די הויפט פראפעלערס זענען גענצליך אפגעריסן געווארן.

בחמלת ה' זענען סיי דער אינסטראקטאר און סיי דער סטודענט פיילאט ארויסגעקראכן פונעם צעשמעטערטן העליקאפטער מיט בלויז לייכטע וואונדן. די NTSB לייגט די פולע שולד אויפן אינסטראקטאר פארן אוועקנעמען זיינע הענט און אויפמערקזאמקייט פונעם פליען אפילו פאר א קורצע מאמענט.

וועטעראן פלי-אינסטראקטארס זאגן אז דער אינצידענט איז א שארפע דערמאנונג ווי ווייניג פלאץ פאר טעותים עס איז דא ביי א העליקאפטער אין פארגלייך צו א געווענליכע פליגער. ביי א פליגער האבן פיילאטן געווענליך מער צייט צו כאפן און פאררעכטן א טעות בעפאר עס קומט צו א קראך, אבער ביי א העליקאפטער - בפרט ווען מען שוועבט נאנט צו דער ערד - איז די צייט צו רעאגירן אסאך קערצער, און עס לאזט כמעט נישט איבער קיין מעגליכקייט זיך צו ראטעווען פון א דיסטראקציע אין די אומריכטיגע מינוט.

די אלגעמיינע אנווייזונג צווישן פיילאטן איז, זיך צוריקצוהאלטן פון טון סיי וואספארא אומנויטיגע זאכן בשעת'ן זיין אין די לופטן. אויב א געוויסע זאך קען ווארטן ביז דער העליקאפטער איז זיכער אויף דער ערד, זאל מען ווארטן און עס דעמאלטס מסדר זיין.

דער קראך אין סידער סיטי האט זיך טאקע געענדיגט אן קיין ערנסטע פארוואונדעטע, אבער עקספערטן אין די פלי-אינדוסטריע רופן עס אן א ריינע נס און א מזל, אויף וואס מען קען זיך בשום אופן נישט פארלאזן.