בס"ד

אנגעצויגנקייט אין די הארמוז דורכגאס: איראנער רעוואלוציאנערע גווארדיע סטראשעט שיפן, פאדערט זיי זאלן זיך צוריקקערן קיין דובאי

די אנגעצויגנקייט אין די סטראטעגישע הארמוז דורכגאס (Strait of Hormuz) האלט אין איין שטיגן, נאכדעם וואס עס זענען אריינגעקומען באריכטן אז די איראנער 'רעוואלוציאנערע גווארדיע' (IRGC) האט געסטראשעט עטליכע קאמערציאלע שיפן וואס האבן פרובירט דורכצופארן דעם ראיאן. צווישן די שיפן זענען די פראכט-שיף 'NEW BORN 26' און די אויל טאנקער 'FELICITY'.

לויט די באריכטן, האבן די איראנער באפוילן פאר די שיפן אפצולאזן זייער רייזע און זיך צוריקקערן קיין דובאי, אדער וועלן זיי אויסשטיין שווערע קאנסעקווענצן. די פרישע סטראשונגען זענען א טייל פון א רייע קאנפראנטאציעס מיט קאמערציאלע שיפן, אין א צייט וואס טעהראן פרובירט ארויפצוצווינגען שטרענגע באגרעניצונגען אויף די וואסער-פארקער אין איינע פון די וועלט'ס וויכטיגסטע ענערגיע רוטס. אין די לעצטע וואכן האט די רעוואלוציאנערע גווארדיע עטליכע מאל געמאלדן אז שיפן וואס פארן אויף אומערלויבטע רוטס זענען געשעדיגט געווארן, כאטש וואס נישט אלע אינצידענטן זענען זעלבסטשטענדיג באשטעטיגט געווארן.

געשעדיגטע שיפן און מינעס

די לעצטערע אנטוויקלונגען קומען נאך וואס איראן האט געמאלדן אז אן אומאידענטיפיצירטע אויל טאנקער האט זיך אונטערגעצינדן נאכ'ן קראכן אין א פלאטע-מינע (naval mine) נעבן די הארמוז דורכגאס. לויט איראן, האט די שיף אויסגעלאשן אירע טרעקינג סיסטעמען בעת'ן אריינפארן אין א פארבאטענע זאנע.

ענליכע באריכטן איבער געשעדיגטע שיפן און מינע אויפרייסן זענען שוין געהערט געווארן אין די לעצטערע תקופה, וואס ברענגט ארויף ערנסטע זארגן איבער די זיכערהייט פון די מאנשאפטן אויף די שיפן און די סטאביליטעט פון אינטערנאציאנאלע שיפינג רוטס. די הארמוז דורכגאס איז א קריטישע דורכגאנג פאר די גלאבאלע אויל און גאז טראנספארטאציע, און א לענגערע שטער קען ברענגען שווערע קאנסעקווענצן פאר די ענערגיע מארקעטס און לענדער וואס זענען אנגעוויזן אויף די סופליי וואס קומט פונעם גאלף.

דערווייל פעלט נאך א זעלבסטשטענדיגע באשטעטיגונג איבער די פונקטליכע דעטאלן פונעם פייער אויפ'ן טאנקער און די סטראשונגען קעגן די 'NEW BORN 26' און 'FELICITY' שיפן. אבער מיט די וואקסנדע אומזיכערהייט פאר קאמערציאלע שיפן, קענען פרישע קאנפראנטאציעס אריינווארפן דעם ראיאן אין א טיפערע מאריטים קריזיס און שווער מאכן די באמיאונגען צו אנהאלטן די פרייהייט פון נאוויגאציע אין די אינטערנאציאנאלע וואסערן.