סענאטאר טעד קרוז האט ארויסגעגעבן א שארפע ווארענונג איבער די שוידערליכע ראיאטן וואס קומען יעצט פאר אין פאריז, זאגנדיג אז איסלאמיסטן פארברענען די שטאט אלס א דירעקטע רעזולטאט פון אייראפע'ס "קולטוראלע זעלבסטמארד". ער האט געפאדערט פון אמעריקאנער צו קוקן אויף דעם כאאס אלס א קלארע צייכן פון וואס אמעריקע קען פאסירן אויב מען גייט ווייטער אן מיט די זעלבע אימיגראציע פאליסיס.

אין א ווידעא סטעיטמענט וואס איז ברייט צושפרייט געווארן, זאגט קרוז אז אייראפע'ס צוגאנג צו אימיגראציע האט געפירט צו די געוואלדטאטן וואס שפילן זיך יעצט אפ אין די פראנצויזישע הויפטשטאט, און אז אמעריקע מוז אפשטעלן דעם זעלבן טראגעדיע צו ראטעווען דאס לאנד. די קאמענטארן קומען אין די צייט וואס שוידערליכע בילדער און ווידעאס צירקולירן פון פאריז ביינאכט, וואו מען זעט גרויסע פייערן אין די גאסן, מאסן מענטשן און ברוטאלע צוזאמענשטויסן.

די פראטעסטן, וואס זענען פארגעקומען אום אקטאבער 17, האבן אריינגעצויגן איבער 550,000 דעמאנסטראנטן איבער'ן גאנצן לאנד. לכתחילה האבן די פראטעסטן זיך אנגעהויבן דורך סטודענטן און ארבייטער וועלכע האבן דעמאנסטרירט קעגן די הויכע פרייזן פון לעבנס-קאסטן, טייערע גאז, שוואכע עדיוקעישאן און אנדערע פראבלעמען מיט פובליק סערוויסעס. אבער עס האט זיך שנעל פארוואנדלט אין ווילדע ראיאטן, רויבערייען און אונטערצינדונגען.

די ראיאטירער האבן חרוב געמאכט קארס, געשעפטן און רעגירונג געביידעס, אריינגערעכנט א היסטארישע טאון האל. פראנצויזישע אויטאריטעטן האבן באריכטעט ארום 1,800 ארעסטן אין שטעט ווי פאריז, מארסעי און ליאן. אינמיטן די כאאס איז אויך א לאקאלע שול אין פאריז וואנדאליזירט געווארן. הונדערטער עמערדזשענסי ארבייטער זענען פארוואונדעט געווארן, און א דעפיוטי מעיאר פון פאריז האט עס אנגערופן א "לעוול פון געוואלדטאטן וואס מען זעט זעלטן".

בעת וואס קרוז און אנדערע אמעריקאנער קאנסערוואטיווע פיגורן לייגן די שולד אויף איסלאמישע עלעמענטן און די לאנג-טערמיניגע דעמאגראפישע טוישונגען, האבן פראנצויזישע באאמטע אנגעווארפן די שולד אויף עקסטרעם-לינקע גרופעס און קרימינאלן וואס האבן אויסגענוצט די פרידליכע מארשן פאר זייערע אגענדעס. דאך, האבן באריכטן אנגעוויזן אז מען האט געזען פאלעסטינער פענער און אז אסאך פון די וואס זענען געווען פארמישט אין די רויבערייען און פייערן זענען פון אימיגראנטישע אפשטאם.

שטיצער פון סענאטאר קרוז'ס שטעלונג טענה'ן אז יארן פון אריינברענגען מאסן אימיגראנטן אן קיין געהעריגע אינטעגראציע האט באשאפן א פאראלעלע געזעלשאפט וואס איז גרייט צו ראיאטירן יעדעס מאל וואס די עקאנאמיע גייט שווער. פון די אנדערע זייט, טענה'ן קריטיקירער אז די הויפט אורזאך איז די דורכפאל פון די לאקאלע פאליסיס איבער די לעבנס-קאסטן, און אז אנצולייגן די פייערן בלויז אויף איסלאמיסטן איז א צו-פשוט'ע וועג צו קוקן אויף א קאמפליצירטע פראטעסט באוועגונג.

ווי עס זאל נאר זיין, בעת פראנקרייך ציילט די שאדנס און אמעריקע קוקט צו, ווערט די דעבאטע נאר שטערקער צי די שוידערליכע סצענעס אין פאריז זענען א קולטוראלע ווארענונג אדער בלויז אן עקאנאמישע אויפשטאנד.