בס"ד

טראגעדיע אין רוסלאנד: 11 אומגעקומען און 6 פעלן נאך וואס א מאסיווע שניי-לאווינע האט באגראבן א גרופע קלעטערער אויף א בארג

א שרעקליכע טראגעדיע האט פאסירט אין די קאבארדינא-באלקאריע ראיאן אין רוסלאנד, ווען א מאסיווע שניי-לאווינע (עוועלאנטש) האט אראפגעקראכט אויפן בארג 'מיזשירגי', איבערלאזנדיג כאטש 11 טויטע און נאך 6 וואס פעלן.

די לאווינע האט פאסירט זונטאג סעפטעמבער 6, ארום 5:00 נאכמיטאג לאקאלע צייט, און האט באטראפן א גרופע פון 33 מענטשן וואס זענען געווען אינמיטן קלעטערן דעם בארג. לויט די רוסישע עמערדזשענסי מיניסטעריום, זענען 6 קלעטערער פארוואונדעט געווארן און אפגעפירט געווארן אין שפיטאל, בשעת 10 אנדערע האבן באוויזן אראפצוקריכן פונעם בארג אויף זייער אייגענע קראפט און זיך געראטעוועט דאס לעבן.

איבער 50 רעטונגס ארבעטער זענען פארמישט אין די אפעראציעס צו טרעפן די פארבליבענע פעלנדע. די שווערע בערגיגע טעריין, שלעכטע וועטער קאנדישאנס, און די אנגייענדע געפאר פון פרישע שניי-פאלן מאכן אבער גאר שווער די רעטונגס ארבעט. העליקאפטערס שטייען גרייט ארויסצוהעלפן מיט די זוכונגען ווי נאר די וועטער וועט זיך אביסל אויסקלארן און ערלויבן א זיכערע צוטריט צו די הויכע בערג.

די ערשטע באריכטן איבער דעם אינצידענט האבן אנגעהויבן אריינקומען זונטאג אוונט צום עמערדזשענסי צענטער. לכתחילה האט מען געמיינט אז די צאל קרבנות איז קלענער, אבער ווי שפעטער די אינפארמאציע איז אריינגעקומען, האט זיך ארויסגעשטעלט די שוידערליכע ציפער פון די טויטע און פעלנדע. די גרופע איז געווען אפיציעל רעגיסטרירט צו קלעטערן אין די געגנט, און ספעציעלע הויכע-אלטיטוד רעסקיא טיעמס זענען אראפגעברענגט געווארן צום סצענע ארויסצוהעלפן.

די געגנט ארום דעם בארג מיזשירגי איז באקאנט אלס א גאר שווערע און געפארפולע פלאץ פאר קלעטערער, און שניי-לאווינעס זענען אן אפטער ערשיינונג דארט, ספעציעל אין די הויכע ספערן.

די אויטאריטעטן האלטן א נאנטע אויג אויף די מצב בעת די זוכונגען גייען אן. די פארוואונדעטע באקומען מעדיצינישע באהאנדלונג, און די הויפט פאקוס יעצט איז צו טרעפן די 6 פעלנדע קלעטערער און פארזיכערן די זיכערהייט פון די רעטונגס טיעמס וואס ארבעטן אין די אומסטאבילע אומשטענדן. לאקאלע עקספערטן זאגן אז די פארנעם פון די יעצטיגע לאווינע איז גאר א גרויסע און אומגעווענליכע פאר די געגנט.