סעקרעטערי אוו סטעיט מארקא רוביא מעלדט: אויל פלוס אינעם הארמוז אדורכגאס קערט זיך צוריק צום נארמאל נאך מאנאטן פון כאאס

אמעריקאנער סעקרעטערי אוו סטעיט מארקא רוביא האט די וואך איבערגעגעבן א זעלטענע שטיקל גוטע עקאנאמישע נייעס, ווען ער האט אנטפלעקט אז די אויל פלוס דורכן הארמוז אדורכגאס הייבט אן צוריקצוקומען צום נארמאל נאך לאנגע מאנאטן פון שטערונגען.

"מיר האלטן יעצט ביי ארום 60 ביז 70 פראצענט פון די אויל פלוס וואס פלעגט ארויסקומען פון דארט, און עס האלט אין איין שטייגן," האט רוביא געזאגט.

דאס איז א געוואלדיגע טויש פאר איינע פון די וועלט'ס מערסט קריטישע ענערגיע רוטעס, א וועג וואס טראגט ארום א פינפטל פון די גלאבאלע אויל און גאז סופליי יעדן איינציגן טאג. די יעצטיגע ערהוילונג קומט נאך א שווערע תקופה וואס האט זיך אנגעהויבן נאך די אמעריקאנער און מדינת ישראל אטאקעס אויף איראן אינעם פארגאנגענעם חודש פעברואר, ווען טעהראן האט רעאגירט מיט'ן צילן קאמערציאלע שיפן און פארוואנדלען דעם אדורכגאס אין אן עכטע סכנה זאנע פאר שיפערס.

אויפן העכסטן פונקט פונעם קריזיס, איז די טעגליכע טראפיק פון טענקערס דורכן הארמוז געפאלן פון ארום 140 שיפן צו בלויז געציילטע. דאס האט געברענגט אז אינשורענס פרייזן זאלן ארויפשפרינגען אין די הימלען, און האט איבערגעלאזט טויזנטער מאטראסן געשטראנדעט אויפן וואסער אן קיין מעגליכקייט זיך צו רירן.

רוביא'ס מעלדונג צייגט אז די דרוק קאמפיין און דיפלאמאטישע באמיאונגען צו סטאביליזירן דעם ראיאן הייבן אן ברענגען רעזולטאטן, אפילו בשעת די אנגעצויגנקייט מיט איראן איז נאך ווייט פון פאראיבער. ביי די זעלבע אויפטריט האט רוביא איבערגעחזר'ט וואשינגטאן'ס שטרענגע פאזיציע איבער טעהראן'ס נוקלעארע אמביציעס. ער האט קלארגעשטעלט אז א ראדיקאלע רעזשים מיט איראן'ס רעקארד פון טעראר און אגרעסיע קען קיינמאל נישט ערלויבט ווערן צו פארמאגן א נוקלעארע וואפן.

דערווייל אבער, איז די צוריקקער פון די אויל פלוס א זעלטענע צייכן פון סטאביליטעט אין א ראיאן וואס איז געווען אויף רעדער א גרויס טייל פונעם יאר.