טראגיש: צוויי אומגעקומען נאכדעם וואס א קליינע פליגער האט געקראכט און אויפגעריסן אין פלאמען אין סאן דיעגא

א קליינע פליגער האט געקראכט און אויפגעריסן אין א פייער-באלי מאנטאג נאכמיטאג ביים מאנטגאמערי-גיבס עקזעקיוטיוו עירפארט אין סאן דיעגא, איבערלאזנדיג ביידע פאסאזשירן טויט אויפ'ן ארט.

דער פליגער, א 1977 'סעסנע' מאדעל, האט געקראכט ארום 5:20 נאכמיטאג בשעת'ן פרובירן צו לאנדן אויף ראנוועי 28L. לויט ערשטע באריכטן האט דער פילאט פרובירט צו מאכן א 'גאו-עראונד' (ארומפליען נאכאמאל בעפארן לאנדן), ווען דער פליגער האט פלוצלינג פארלוירן קאנטראל, די לינקע פליגל האט זיך אראפגעבויגן, און עס האט אריינגעקראכט אין דער ערד און אויפגעריסן אין פלאמען.

אומשטייער וואס זענען געווען דערנעבן האבן דערציילט אז זיי האבן געהערט א מעכטיגע אויפרייס. איינע פון די עדות האט געזאגט אז זי איז געלאפן צום פליגער צו פרובירן ראטעווען די פאסאזשירן, אבער די היץ און פלאמען זענען געווען צו שטארק. "די פלאמען זענען פשוט געווען צו סאך, אויב וואלטן מיר אריינגעגאנגען דארט, וואלטן מיר אליינס פארברענט געווארן," האט זי דערציילט. אנדערע ארומיגע זענען אנגעלאפן מיט פייער עקסטינגווישערס, אבער דאס פייער האט זיך פארשפרייט צו שנעל אז מען זאל קענען אנקומען צו די מענטשן אינעווייניג.

די סאן דיעגא פייער דעפארטמענט איז אנגעקומען אויפ'ן סצענע און געטראפן דעם פיר-זיציגן פליגער איינגעהילט אין פלאמען און גענצליך חרוב. די פייערלעשער האבן שנעל פארלאשן דאס פייער, אבער האבן ליידער נישט געקענט ראטעווען די קרבנות. די אויטאריטעטן האבן אויך געדארפט קלינען א גרויסע געזאלין אויסגיסונג אויפ'ן ראנוועי. דער עירפארט איז צייטווייליג פארמאכט געווארן בשעת עמערדזשענסי אגענטורן האבן פארזיכערט דעם געגנט און אינוועסטיגעיטארס האבן אנגעהויבן זייער ארבעט.

דער פליגער, וואס איז רעגיסטרירט אין איידעהאו, איז א גאר באקאנטע מאדעל וואס ווערט אפט גענוצט פאר פלייט טרענירונגען. די NTSB (נעשאנאל טראנספארטעישאן סעיפטי בארד) פירט אן די אויספארשונג איבער די אומשטענדן פונעם קראך, אינאיינעם מיט די FAA. דערווייל זענען די נעמען פון די אומגעקומענע נאכנישט ארויסגעגעבן געווארן פאר די פובליק.

דער מאנטגאמערי-גיבס עירפארט דינט געווענליך פאר פריוואטע פלייטס און פלייט טרענירונגען. וויבאלד עס איז געווען דעם 'לעיבאר דעי' יום טוב, זענען געווען ווייניגער מענטשן ווי געווענליך ביים עירפארט בעת דעם עקסידענט. די NTSB וועט איצט אונטערזוכן די פלייט דאטא, מעינטענענס רעקארדס, די וועטער אומשטענדן און די אקציעס פונעם פילאט, צו דערגיין פונקטליך וואס האט געפירט צו דעם טראגישן קראך.