דער נייער 'גרעניץ צאר' טאם האומען האט ארויסגערופן פרישע שפעקולאציעס ארום די פעדעראלע אויספארשונג קעגן די מינעסאטע דעמאקראטישע קאנגרעספרוי אילאן אומאר. ביי אן אינטערוויו אויף 'פאקס ניוז' דעם שבת, איז ער געפרעגט געווארן גראד אין פנים אריין צי די קעיס איז בלויז איבער אימיגרעישאן פראד, אדער צי די אויטאריטעטן קוקן אריין אין אנדערע פארברעכנס, אריינגערעכנט זאכן וואס האבן צוטון מיט איר היים-סטעיט מינעסאטע.

האומען האט זיך אפגעשטעלט פאר א סעקונדע, זיך אונטערגעשמייכלט, און געזאגט: "איך ווייס זאכן, אבער דאס איז א פראגע פאר די עף-בי-איי." ווען דער אינטערוויוער האט אים נאכאמאל געדרוקט צי עס האט א שייכות מיט מינעסאטע, האט ער זיך ווידער ארויסגעדרייט פון ענטפערן.

די קאמענטארן קומען נאכדעם וואס פעדעראלע אגענטן האבן אדורכגעפירט אן אבלאווע אויף אומאר'ס הויז אנהייב וואך אלס טייל פון א קרימינאלע אויספארשונג. כאטש די באאמטע האבן דערווייל נישט ארויסגעגעבן קיין פונקטליכע דעטאלן, צייגן באריכטן אז עס האט א שייכות מיט איר אימיגרעישאן סטאטוס.

האומען האט שוין פריער באשטעטיגט אז די אימיגרעישאן אגענטור 'אייס' (ICE) קוקט אריין אין קלאגעס קעגן אומאר, אבער האט כסדר אפגעזאגט צו טיילן ספעציפישע אינפארמאציע. פון איר זייט האט אומאר שארף געלייקנט די באשולדיגונגען פון אימיגרעישאן פראד, אנרופנדיג עס "פיינטליכע ליגנטס". זי האט צוגעגעבן אז זי ווייסט בכלל נישט וואס מען פארשט אויס און זי ערווארט אז די אויספארשער וועלן נישט געפינען קיין שום באווייזן קעגן איר.

דערווייל זענען נאך קיין טשארדזשעס נישט געמאלדן געווארן, און האומען'ס רמזים זאגן נישט ארויס וואספארא באווייזן די אויספארשער האבן אין די הענט. אויפן אינטערנעט דרייען זיך פארשידענע קאנספיראציעס און טעאריעס איבער אנדערע פארברעכנס וואס גייען פיל ווייטער פון דעם וואס איז אפיציעל באשטעטיגט געווארן. די גרויסע פראגעס וואס אלע פרעגן יעצט זענען: וואס פונקטליך נעמט די אויספארשונג ארום? וואס האבן די אגענטן געטראפן ביי איר אינדערהיים? און צי עס וועלן נאכפאלגן קרימינאלע טשארדזשעס?