וויצע פרעזידענט דזשעי די ווענס ווארנט אמעריקאנער זיך צוצוגרייטן פאר א לענגערע צייט פון הויכע גאז פרייזן; לייגט די שולד דירעקט אויף איראן

וויצע פרעזידענט דזשעי די ווענס האט נאכאמאל ארויפגעלייגט די פולע שולד פון די יעצטיגע הויכע גאז פרייזן דירעקט אויף איראן. רעדנדיג צו רעפארטערס אויפן עירפארט טארמאק, האט ווענס געווארנט אז אמעריקאנער בירגער דארפן זיך אנגארטלען און זיך צושטעלן צו א לענגערע פאזע פון טייערע פרייזן ביים פאמפ.

"איך גלייב אז מיר אלע מוזן אקצעפטירן דעם פאקט אז כל זמן די איראנער פרובירן צו טעראריזירן אינטערנאציאנאלע שיפראטעס, גייען מיר פארשטייט זיך פרובירן צוריקצושלאגן, אבער דאס איז די סיבה פארוואס די גאז פרייזן זענען אזוי הויך," האט ווענס געזאגט. ער האט אנגעוויזן אויף די כסדר'דיגע איראנער אטאקעס אויף קאמערציאלע שיפן אינעם 'סטרעיט אוו הארמוז', אפילו נאכדעם וואס טעהראן האט פריער איינגעשטימט דאס אפצושטעלן, אלס די דירעקטע אורזאך פאר די פרייז דרוק וואס פלאגט די אמעריקאנער מארקעט.

ווענס נוצט שוין די דאזיגע ערקלערונג פאר עטליכע מאנאטן, זינט די גאז פרייזן האבן אנגעהויבן שטייגן נאכדעם וואס די מלחמה מיט איראן האט אויסגעבראכן. ער האט אראפגעלייגט די אמעריקאנער נעיווי אנוועזנהייט אינעם גאלף אלס אן אבסאלוטע נויטווענדיגקייט צו האלטן די אויל פלוס אפן, און נישט בלויז אן אפציע. ער האט ארגומענטירט אז אן אמעריקאנער אינטערווענץ, וואלט איראן פולשטענדיג אפגעשפארט דעם הארמוז דורכגאנג - א קריטישע רוטע דורך וועלכע ארום א פינפטל פון די וועלט'ס אויל גייט געווענליך דורך - און אז די אלטערנאטיוו צו די היינטיגע הויכע פרייזן וואלט געווען א פיל ערגערע גלאבאלע ענערגיע קריזיס.

אין די פארגאנגענהייט האט ווענס אנגערופן די פרייז העכערונגען א "צייטווייליגע פראבלעם" און פאראויסגעזאגט אז די קאסטן וועלן פאלן איינמאל די קאנפליקט וועט זיך בארואיגן, כאטש ער האט אויך מודה געווען אז עס ערווארט א "שווערע וועג פאראויס" פאר קאנסומערס דערווייל. אין צייט וואס די איראנער אטאקעס אויף שיפן גייען ווייטער אן פון צייט צו צייט, אפילו אין טעג פון רעלאטיווע רואיגקייט, בלייבט די פראגע איבער ווען די אדמיניסטראציע וועט קענען ברענגען אן עכטע לייזונג ביים פאמפ אן אפענע.