דראמא אין ענגלאנד: 5 ארעסטירט נעבן אמעריקאנער מיליטערישע באזע אויף פארדאכטן פון פלאנירן א טעראר אטאקע

בריטישע קאונטער-טעראריזם פאליציי האבן אנגעהויבן א מעדזשאר אויספארשונג זונטאג פארטאגס, נאכדעם וואס פינף מענטשן זענען ארעסטירט געווארן נעבן די 'רעף פערפארד' (RAF Fairford) באזע אין גלאסטערשיר, א באזע וואס ווערט שוין לאנגע יארן באנוצט דורך די אמעריקאנער עיר-פארס. די ארעסטירטע זענען פארדעכטיגט אין פלאנירן א טעראריסטישע אטאקע.

די אלארם האט זיך אנגעהויבן ארום 12:45 ביינאכט, ווען די פאליציי האט באקומען א רוף איבער דריי פארדעכטיגטע ווייסע ווענס וואס פארן אין די ריכטונג פון די באזע. דאס האט געפירט צו א שנעלע רעאקציע פון באוואפנטע פאליציי אפיצירן, וועלכע האבן אפגעשטעלט און ארעסטירט די מענטשן אינעם דערנעבנדיגן דארף 'וועלפארד'.

באמבע סקוואדס און מיליטערישע עקספלאסיוו עקספערטן זענען אראפגערופן געווארן צום סצענע אונטערצוזוכן די קארס. די פאליציי האט אויפגעשטעלט א בלאקאדע פון 400 מעטער, און ארום 85 דערנעבנדיגע הייזער זענען עוואקואירט געווארן אלס א פריוואנטיווע שריט. ברוך השם עס זענען נישט דא קיין פארוואונדעטע, און אלע פינף פארדעכטיגטע זענען ווייטער אין פאליצייאישע ארעסט בשעת די אויספארשונג גייט אן.

ווידעא קליפס פונעם סצענע צייגן ווי באוואפנטע טאקטישע אפיצירן האלטן דעם גאנצן געגנט פארשפארט, אינדערצייט וואס א ספעציעלע באמבע-ראבאט דערנענטערט זיך צו די ווענס וואס זענען געשטאנען מיט אפענע טירן אין א וואלדיגע געגנט נעבן די באזע.

די 'פערפארד' באזע דינט שוין צענדליגע יארן אלס א הויפט לאקאציע פאר אמעריקאנער עיר-פארס באמבאדיר פליגערס. לעצטנס זענען דארט געווען סטאנציאנירט די מעכטיגע B-52 פליגערס וואס זענען באנוצט געווארן אין די אמעריקאנער אטאקעס אויף איראנער צילן אנהייב יאר.

כאטש די אינסטאנצן האבן נאך נישט אפיציעל באשטעטיגט אז די באזע איז טאקע געווען דער ציל פון די אטאקע, האבן באאמטע פון ביידע זייטן פונעם אטלאנטישן אקעאן אונטערגעשטראכן אז זיי ארבעטן אינאיינעם מיט א נאנטע קאארדינאציע. דאס אמעריקאנער מיליטער האט געמאלדן אז זיי ארבעטן אינאיינעם מיט די בריטישע אגענטורן צו באשיצן די אמעריקאנער פערסאנעל און די לאקאלע קאמיוניטי. פון זייער זייט האבן בריטישע באאמטע אנגעוויזן אויף די וויכטיגקייט זיך צו היטן פון סטראשונגען פון אויסלענדישע שטאטן און זייערע טעראר-שלוחים, בעת די אויספארשונג גייט ווייטער אן מיט א פולן שוואונג.