א ראבאט זאל רייניגן אייער באדראם? א נייע קאמפאני אפערט ראבאטישע קלינינג סערוויסעס פאר 60 דאלאר א וויזיט

א סאן פראנציסקא ראבאטיקס סטארטאפ קאמפאני פרובירט אריינצוברענגען מענטשליכע-געשטעל ראבאטן צו טון טעגליכע הויז ארבעט, אפערנדיג פאר קאסטומערס די אפציע צו דינגען א מאשין צו רייניגן זייערע באדראמס פאר 60 דאלאר א וויזיט.

די קאמפאני, 'טאו ראבאטיקס' (Tau Robotics), אפערט א וועכנטליכע קלינינג סובסקריפשאן וואס קומט מיט א ראבאט מיטן נאמען 'סערגעי'. אין א ווידעא וואס די קאמפאני האט ארויסגעשטעלט, זעט מען ווי דער מאשין ווישט אפ די קאונטערס, שפילט אויס דעם טוילעט און רייניגט ארום דעם סינק. די ווידעא גיט א בליק ווי אזוי ראבאטיקס קאמפאניס פרובירן זיך צו רוקן ווייטער פון בלויז אינדוסטריאלע פלעצער און אנהייבן אריינברענגען אטאמאטישע מאשינען אין פריוואטע היימען.

אבער אנדערש ווי פולשטענדיגע אטאמאטישע ראבאטן, ארבעט די יעצטיגע סערוויס פון 'טאו' דורך "טעלע-אפעראציע", וואס דאס מיינט אז אן אמת'ער מענטש קאנטראלירט דעם מאשין פון דערווייטנס מיט די הילף פון אן 'עי-איי' (AI) סיסטעם. די קאמפאני האט אויך געוויזן ווי זיי נוצן צוויי ראבאטן אויף איין מאל פאר הויז ארבעט ווי וועקיומען, מאפן און באדראם מעינטענענס, מיט א פרייז וואס הייבט זיך אן ביי ארום 30 דאלאר פער ראבאט-שטונדע.

די נייע סערוויס האט געצויגן אסאך אויפמערקזאמקייט אויפן אינטערנעט, וואו מענטשן האבן רעאגירט מיט א געמיש פון קאמישקייט, נייגעריגקייט און סקעפטיציזם צי דער ראבאט קען טאקע טון די ארבעט געהעריג און פארלעסליך. טייל האבן אפילו געפרעגט צי די ווידעא צייגט אן אמת'ן ראבאט אדער א מענטש וואס באהאלט זיך אונטער די קוליסן, בעת אנדערע האבן דעבאטירט צי עס לוינט זיך צו צאלן 60 דאלאר פאר א באדראם קלינינג וויזיט אנשטאט עס צו טון אליינס.

פונדעסטוועגן, ברענגט דאס ארויס א נייע ביזנעס מאדעל וואו קאנסומערס צאלן פאר ראבאטישע ארבעט אלס א סערוויס, אנשטאט צו קויפן א טייערע ראבאט פאר זיך אליינס. די פאקט אז עס פאדערט זיך א מענטש עס צו קאנטראלירן צייגט אויף די יעצטיגע לימיטאציעס פון הויז ראבאטן: די מאשינען קענען טאקע טון די פיזישע ארבעט, אבער א מענטשליכע אויפזעער איז נאך אלס נויטיג. אבער אויב קאמפאניס ווי 'טאו ראבאטיקס' וועלן קענען פארבעסערן די זעלבסטשטענדיגקייט, פארלעסליכקייט און פרייז, קען א ראבאט-קלינינג סערוויס עווענטועל ווערן א נארמאלע ערשיינונג אין די טעגליכע לעבן.