בס"ד

כאאס אין פראנקרייך: מאסקירטע פראטעסטירער שטורעמען פאליציי העדקווארטערס אין פאריז אינמיטן העפטיגע אומרוען

מאסקירטע פראטעסטירער האבן פרובירט מיט געוואלד אריינצוברעכן אין די היסטארישע העדקווארטערס פון די פראנצויזישע 'זשאנדארמעריע' (נאציאנאלע פאליציי) אין פאריז, לויט ווי מען זעט אויף ווידעא קליפס וואס צירקולירן אינמיטן די שווערע אומרוען וואס פלאגן די פראנצויזישע הויפטשטאט. פון אינעווייניג אינעם געביידע האבן די זיכערהייט וועכטער רעאגירט מיט פעפער-ספרעי און 'סטאן גרענעידס' צו צוריקטרייבן די צעווילדעוועטע מאסן וואס האבן זיך געשטיפט צום אריינגאנג.

דער קאנפראנטאציע קומט אינמיטן א פרישע כוואליע פון פראטעסטן וואס האט זיך פארשפרייט איבער גאנץ פראנקרייך. די אומרוען זענען א רעזולטאט פון די וואקסנדע אויפברויז איבער די הויכע פרייזן און קאסטן פון לעבן, די שוואכע צושטאנד אין די שולעס, און אלגעמיינע טענות איבער פובליק סערוויסעס. די דעמאנסטראציעס האבן עסקאלירט דעם 17'טן אקטאבער אין געוואלדטאטן, פלינדערייען און אטאקעס אויף רעגירונגס געביידעס און לאקאלע ביזנעסער אין פאריז, מארסעי, ליאן און אנדערע גרויסע שטעט.

פראנצויזישע אויטאריטעטן געבן איבער אז עס זענען פארגעקומען א גרויסע צאל ארעסטן, און פילע פאליציאנטן זענען פארוואונדעט געווארן בעת זיי האבן זיך געראנגלט צו האלטן קאנטראל אויף די פילע פראנטן איבער די שטעט.

די רעגירונג איז אונטער שווערע קריטיק איבער זייער שוואכע צוגרייטונגען, און באאמטע האבן טאקע מודה געווען אז זיי זענען נישט געווען גרייט פאר די פארנעם און שנעלקייט פון די געוואלדטאטן. דער פראנצויזישער פרעימיער מיניסטער, סעבאסטיען לעקארנו, האט צוגעזאגט א פיל גרעסערע זיכערהייט אפעראציע פאר קומענדיגע פראטעסטן, אריינגערעכנט פרישע פאליציי קרעפטן און געצילטע 'קערפיוס' אין די אפעקטירטע געגנטער.

פון די אנדערע זייט, הערט זיך אויך קריטיק קעגן די פאליציי טאקטיקן, בפרט איבער דעם באנוץ פון געווער צו קאנטראלירן די מאסן וואס האבן פאראורזאכט ערנסטע וואונדן ביי די לעצטערע דעמאנסטראציעס. כאטש אסאך פון די פראטעסטירער קומען ארויס אויף א פרידליכן אופן צו פראטעסטירן די עקאנאמישע דרוק, זענען אבער דא געוואלדטאטיגע גרופעס וואס ווערן באשולדיגט אין אטאקירן פאליציאנטן, אנמאכן שאדנס פאר פראפערטי און אויסרויבן געשעפטן.

דער אינצידענט ביי די זשאנדארמעריע העדקווארטערס שטרייכט אונטער די שווערע אומשטענדן מיט וואס די אויטאריטעטן ספראווען זיך, פרובירנדיג צו באשיצן פובליק אינסטיטוציעס בשעת'ן פירן קאנטראל אויף די אנגייענדע פראטעסטן. מיט ערווארטונגען פאר נאך פראטעסטן אין די קומענדיגע טעג, שטייט פראנקרייך אונטער א שווערן דרוק צוריקצושטעלן די ארדענונג אין לאנד און אדרעסירן די פראבלעמען וואס האבן אנגעצינדן די אומרוען.