צה"ל פארעפנטליכט דראון ווידעא ווי טעראריסט נוצט א קינד צו פירן וואפן אין עזה

די מדינת ישראל מיליטער האט ארויסגעגעבן א דראון ווידעא פון צענטראל עזה, וואס צייגט ווי א טעראריסט הייסט א קינד טראגן וואפן אריין אין א ציווילע וואוינונג, מיט'ן ציל אפצוהאלטן די מיליטער פון אטאקירן די וואפן טראנספערונג.

לויט די מיליטער, וועלכע האט ארויסגעלייגט די ווידעא זונטאג, האבן זעלנער וואס אפערירן נעבן די פליטים לאגערן אין צענטראל עזה באמערקט די צוויי גיין אויף די גאסן מיט לאנגע חפצים, און האבן אידענטיפיצירט דאס קינד אויפ'ן ארט. די מיליטער זאגט אז ווי נאר זיי האבן באמערקט אז א קינד איז אנוועזנד, האבן זיי זיך צוריקגעהאלטן פון דורכפירן אן אטאקע קעגן דעם מאן.

די מיליטער האט אראפגעמאלן דעם אינצידענט אלס א ביישפיל פון די "סיסטעמאטישע אויסנוצונג פון קינדער" דורך טעראר גרופעס, וואס איז א קלארע פארלעצונג פון אינטערנאציאנאלע געזעצן. די ווידעא פון די לופטן צייגט ווי די צוויי גייען אדורך באוואוינטע גאסן בעפאר'ן אריינגיין אין א הויז. די מיליטער ברענגט דאס אלס באווייז אז די טעראריסטן באהאלטן זייערע וואפן און לאגיסטיקס אינעווייניג אין געדיכט באוואוינטע ציווילע געגנטער, א זאך וואס מדינת ישראל טענה'ט שוין א לאנגע צייט.

די מיליטער האט נישט אנגעגעבן פונקטליך ווען די ווידעא איז רעקארדירט געווארן, און די באהויפטונגען זענען נישט זעלבסטשטענדיג באשטעטיגט געווארן. טייל מענטשן אויף די סאציאלע נעצן האבן אפגעווארפן ענליכע ווידעאס אין די פארגאנגענהייט, טענה'נדיג אז די קינדער האבן געטראגן שפילצייג אדער ברוכווארג. פון זייער זייט, האבן כאמאס אטאריטעטן און מענטשנרעכט גרופעס כסדר באשולדיגט די מדינת ישראל קרעפטן אין שעדיגן ציווילע, אריינגערעכנט קינדער, דורכאויס די מלחמה.

די ווידעא קומט אין א צייט וואס די זעלנער פונעם 'סאוטערן קאמאנד' בלייבן סטאנציאנירט לענגאוס די אזוי-גערופענע 'געלע ליניע' אונטער די יעצטיגע אראנזשירונגען אין עזה, און די מיליטער זאגט אז זיי וועלן ווייטער אנגיין מיט אפעראציעס קעגן סיי וועלכע פרישע דראונג.