זעלענסקי ערקלערט פארוואס אוקראינע האט באנייט די דראון אטאקעס אויף רוסישע אויל רעפיינעריס

דער אוקראינער פרעזידענט וולאדימיר זעלענסקי האט ערקלערט זיין באשלוס צו באנייען די דראון אטאקעס אויף רוסישע אויל רעפיינעריס, אנווייזנדיג אז רוסלאנד האלט אין איין אטאקירן די אוקראינער ענערגיע אינפראסטרוקטור, וואס האט שוין אומגעברענגט ציווילע בירגער און געפירט צו מאסיווע פאוער אוטעדזשעס איבער'ן לאנד.

אוקראינע האט טאקע פאר א קורצע צייט אפגעשטעלט די אטאקעס נאכדעם וואס פרעזידענט טראמפ האט געמאלדן אן ענערגיע פייער-אפשטעל, אבער לויט זעלענסקי האבן די רוסישע אטאקעס אויף אוקראינע'ס פאוער פאסילעטיס זיך קיינמאל נישט אפגעשטעלט. ער האט אנגעוויזן אויף פריערדיגע געשפרעכן מיט טראמפ און זיין טיעם, וואו ער האט פארגעשלאגן צוויי אלטערנאטיוון אנשטאט די אטאקעס אויף די רעפיינעריס: אדער א קעגנזייטיגע אפמאך זיך צוריקצוהאלטן פון אטאקירן ענערגיע צילן, אדער זאל מען זיי צושטעלן "פאטריאט" עיר דעפענס סיסטעמען, וואס אוקראינע האט זיך אנגעטראגן צו אפקויפן.

דער קאנפליקט טראגט א שטארקע וואג אין וואשינגטאן, וואו אמעריקאנער באאמטע האבן געלייגט דרוק אויף קיעוו אויפצוהערן צילן די רוסישע רעפיינעריס, טענה'נדיג אז אן אפשטעל קען העלפן אראפברענגען די הויכע גאזאלין פרייזן. זעלענסקי האט אבער צוריקגעשלאגן, זאגנדיג אז די הויכע פרייזן קומען הויפטזעכטליך צוליב די מלחמה אין מיטל מזרח. ער האט אונטערגעשטראכן אז ער וויל האלטן אן אפענע קאמוניקאציע מיט די אמעריקאנער שותפים בעת די רוסישע מיסיל און דראון אטאקעס גייען אן אין אלע אוקראינער ראיאנען.

די יעצטיגע אנטוויקלונגען צייגן וויאזוי ביידע לענדער אטאקירן יעצט איינער דעם צווייטנ'ס ענערגיע פאסילעטיס, ווען די ציווילע בירגער אויף ביידע זייטן שפירן די שווערע קאנסעקווענצן. עס בלייבט דערווייל אומקלאר צי וואשינגטאן וועט צושטעלן די פאטריאט סיסטעמען, צי מאסקווע וועט אפשטעלן אירע אטאקעס אויף די אוקראינער גריד, און צי די ווייסע הויז וועט אקצעפטירן דעם צוגאנג.