קריגס סעקרעטאר פיט העגסעט רייסט אראפ אימפיטשמענט באשולדיגונגען איבער מאדורא'ס ארעסט: "ער איז נישט געווארן געקידנעפט!"

וואשינגטאן – דער אמעריקאנער קריגס סעקרעטאר פיט העגסעט האט שטארק אפגעווארפן די אימפיטשמענט באשולדיגונגען פון קאנגרעסמאן טאמעס מעסי, און האט פעלזנפעסט פארטיידיגט די אמעריקאנער מיליטערישע אפעראציע וואס האט געפירט צום ארעסט פונעם ווענעזועלער פירער ניקאלאס מאדורא.

רעדנדיג ביי א פרעסע קאנפערענץ אינעם פענטאגאן דעם 10'טן נאוועמבער, האט העגסעט טענה'ט אז מאדורא איז קיינמאל נישט געווארן "געקידנעפט", נאר ענדערש געברענגט צו גערעכטיגקייט דורך אמעריקאנער קרעפטן נאכדעם וואס ער איז געווען א געזוכטער פארברעכער דורך די אמעריקאנער אויטאריטעטן.

"ער איז נישט געווארן געקידנעפט. ער איז געברענגט געווארן צו גערעכטיגקייט דורך אמעריקע'ס בעסטע. א זיג אין איין נאכט. א זיג אין 48 מינוט, צו זיין פונקטליך!" האט העגסעט דערקלערט, אונטערשטרייכנדיג די שנעלקייט און פונקטליכקייט פון די אפעראציע. ער האט צוגעגעבן אז ארעסטירן א געזוכטן פארברעכער דארף נישט ווערן אנגערופן קידנעפינג.

זיינע ווערטער קומען נאכדעם וואס קאנגרעסמאן טאמעס מעסי האט אריינגעגעבן אכט אימפיטשמענט ארטיקלען, באשולדיגנדיג העגסעט אין אומלעגאלע אויפפירונג ארום די מיליטערישע אפעראציעס אין איראן, ווענעזועלע און תימן, צווישן אנדערע קלאגעס.

העגסעט האט אוועקגעמאכט די אימפיטשמענט פרואוון אלס א פשוט'ע פאליטישע שפיל, זאגנדיג אז חילוקי דעות איבער מיליטערישע פאליסיס דארפן ווערן אויסגעשמועסט דורך געזעצגעבונג, קאנגרעסיאנאלע דעבאטעס און וואלן, און נישט דורך אימפיטשמענט.

מעסי'ס ארטיקל איבער ווענעזועלע באשולדיגט ספעציפיש אז העגסעט האט פארארדנט די אפעראציע צו פארכאפן מאדורא און זיין פרוי, סיליע פלארעס, אן די ריכטיגע קאנסטיטוציאנאלע אדער לעגאלע אויטאריטעט. דער קאנגרעסמאן האט אויך אויפגעברענגט באשולדיגונגען איבער די איראן מלחמה, ציווילע פאטאליטעטן, מיליטערישע אטאקעס און די באהאנדלונג פון אן אמעריקאנער סענאטאר.

פון זיין זייט האלט זיך העגסעט ביי זיינס אז די אפעראציעס זענען געווען הונדערט פראצענט געזעצליך, באשטעטיגט דורך פרעזידענט דאנאלד טראמפ, און דורכגעפירט דורך אמעריקאנער מיליטערלייט וואס האבן בלויז אויסגעפירט זייער פליכט. פרעזידענט טראמפ האט זיך עפנטליך אנגענומען פאר זיין קריגס סעקרעטאר, קריטיקירנדיג מעסי און געפאדערט פון געזעצגעבער צו שטיצן העגסעט.

דער געפעכט שטעלט איצט די לעגאליטעט פון די אדמיניסטראציע'ס מיליטערישע שריט און די גרעניצן פון פרעזידענטליכע קריגס-מאכטן אין צענטער פון א וואקסנדע קאנגרעסיאנאלע קאנפראנטאציע.