געוואלדטאטן און כאאס אין אינדאנעזיע: איבער 150 פראטעסטירער ארעסטירט נאך שווערע צוזאמענשטויסן מיט די פאליציי

שווערע ראיאטן און כאאס האבן אויסגעבראכן אין די שטאט יאגיאקארטא, אינדאנעזיע, דעם נאוועמבער 10, נאכדעם וואס פראטעסטן אפצוצייכענען דעם לאנד'ס "העלדן טאג" זענען פארוואנדלט געווארן אין בלוטיגע צוזאמענשטויסן צווישן דעמאנסטראנטן און די ארטיגע פאליציי. בילדער און ווידעאוס וואס צירקולירן אויפן אינטערנעט צייגן א שרעקליכע כאאס אין די נאכט שטונדן, ווי די גאסן זענען פיל מיט געדיכטע רויך בשעת מאסן מענטשן פארזאמלען זיך נעבן פאליציי קארס און זיכערהייט קרעפטן פרובירן צו צעטרייבן דעם המון.

די פראטעסטן האבן זיך אנגעהויבן גאנץ פרידליך, ווען סטודענטן און אנדערע גרופעס זענען ארויסגעקומען פאדערן העכערע מינימום געהאלט, א בעסערע סיסטעם צו קאנטראלירן ווילדע פייערן, און רעגירונג אקציעס צו לייזן די הויכע פרייזן און לעבנס-קאסטן אונטער די פירערשאפט פון פרעזידענט פראבאווא סוביאנטא.

אבער די אנגעצויגנקייט האט עקספלאדירט שפעטער אין אוונט, ווען א גרופע דעמאנסטראנטן האבן אנגעהויבן ווארפן שטיינער, פייערקראכערס און מאלאטאוו קאקטעילס אין ריכטונג פונעם רעגיאנאלן פארלאמענט געביידע. די פאליציי האט רעאגירט מיט טרערן גאז, וואסער קאנאנען און טאקטישע טראקס, בשעת די אומרוען האבן זיך פארשפרייט צו עטליכע געגנטער, אריינגערעכנט אין מאליאבארא און ארום די 'גאדזשאה מאדא' אוניווערסיטעט.

ביז מיטוואך אינדערפרי האבן די אויטאריטעטן באשטעטיגט אז 154 מענטשן זענען ארעסטירט געווארן אין פארבינדונג מיט די ראיאטן, און די פאליציי זאגט אז זיי האבן קאנפיסקירט מאלאטאוו קאקטעילס און אנדערע חפצים אלס באווייזן. דער נאציאנאלער פאליציי טשיף, סויודי אריא סעטא, האט באזוכט דעם ראיאן און צוגעזאגט אן אויספארשונג צו זען צו די געוואלדטאטן זענען געווען ארגאניזירט פאראויס און וואס די מאטיוון אונטער די חורבנות זענען געווען. די פאליציי האט קלארגעשטעלט אז די ארעסטן זענען דורכגעפירט געווארן אין עטליכע לאקאציעס, אריינגערעכנט ביים טרעפיק סירקעל נעבן די אוניווערסיטעט, אבער זיי האבן אפגעלייקנט באריכטן אז אפיצירן זענען אריין אינעם קעמפוס זעלבסט.

די שווערע פאליצייאישע קראקדאון האט ארויסגערופן שארפע קריטיק פון מענטשנרעכט גרופעס. 'אמנעסטי אינטערנעשענאל אינדאנעזיע' האט גערופן פאר אן אומאפהענגיגע אויספארשונג איבער באשולדיגונגען פון איבערגעטריבענע קראפט און אומלעגאלע ארעסטן. די 'יאגיאקארטא ליגעל עיד אינסטיטוט' האט באריכטעט אז זיי האבן ערהאלטן 64 קלאגעס פון דעמאנסטראנטן, אריינגערעכנט באריכטן איבער ארעסטירטע וואס מען קען זיך נישט פארבינדן מיט זיי, און אנדערע וואס האבן געדארפט ווערן אריינגעפירט אין שפיטאל פאר באהאנדלונג.

אדוואקאטן האבן אויך אויפגעברענגט זארגן איבער די אריינמישונג פון מיליטערישע פערסאנאל און וויאזוי מען האט זיך באגאנגען מיט די פרידליכע פראטעסטירער בעפאר די נאכט-ראיאטן האבן אויסגעבראכן. דער אינצידענט האט געפירט צו א שווערע קריטיק אויף די רעגירונג'ס רעאקציע צו פובליק פראטעסטן, בשעת פראגעס בלייבן נאך אפן איבער די אומשטענדן פון די צוזאמענשטויסן און צו די פאליציי האט גענוצט פראפארציאנאלע מיטלען.