טראמפ'ס קאמישע מאמענט מיט רוביא: דער פרעזידענט וויצלט זיך "יו אר פייערד!" ביי די מאנילא סאמיט, און לויבט אים דערנאך אויס 😂
גאלערי
ווידעאס
פרעזידענט טראמפ מאכט א ווערטל ביי אן אזיאנער סאמיט: "מארקא רוביא, דו ביסט געפייערט!"
פרעזידענט דאנאלד טראמפ האט ארויסגערופן א הילכיגן געלעכטער ביי זיין רעדע ביים אמעריקע-אסיען (ASEAN) סאמיט אין מאנילא, פיליפינען, נאכן מאכן א ווערטל אז ער וועט פייערן זיין סעקרעטערי אוו סטעיט מארקא רוביא אויב ער וועט נישט ענטפערן גענוג שנעל פאר די פירער פונעם ראיאן.
רעדנדיג צו די פירער פון די דרום-מזרח אזיאנער לענדער, האט טראמפ אונטערגעשטראכן אז אמעריקע'ס אליאירטע קענען זיך פארבינדן מיט אים דירעקט ווען אימער זיי האבן א פראבלעם, צי דורך רוביא אדער אנדערע הויכראנגיקע באאמטע אין די אדמיניסטראציע. "עטס קענטס רופן מארקא, עטס קענטס רופן אנדערע, און אויב זיי ענטפערן נישט, רופטס מיך," האט טראמפ געזאגט פאר די פארזאמלטע.
דאן האט ער געלאזט פאלן דעם פאנצש-ליין, זאגנדיג: "מארקא, דו ביסט געפייערט! האסט נישט געענטפערט גענוג שנעל," ציענדיג די אויפמערקזאמקייט צו רוביא, וועלכער איז געזעסן צווישן די אמעריקאנער דעלעגאציע.
טראמפ האט באלד נאכדעם נאכגעפאלגט דעם דזשאוק מיט גרויסע לויב ווערטער פאר זיין סעקרעטערי אוו סטעיט, פרעגנדיג די פירער: "ווי גוט איז מארקא, הא? טוט מארקא א פראכטפולע ארבעט?" ער האט אליין געענטפערט זיין פראגע, זאגנדיג אז רוביא איז "פאנטאסטיש", וואס האט פארוואנדלט דעם אויסטויש אין א גוטמוטיגן מאמענט דורכאויס די וויכטיגע דיפלאמאטישע פארזאמלונג.
דער פרעזידענט האט אויך אויסגעלויבט די ברייטערע אמעריקאנער דעלעגאציע, ספעציעל דערמאנענדיג טרעזשערי סעקרעטערי סקאט בעסענט, קאמערס סעקרעטערי האוערד לאטניק, און די יו.עס. טרעיד רעפרעזענטעטיוו דזשעימיסאן גריר פאר זייער געטרייע ארבעט.
רוביא'ס אנוועזנהייט אינאיינעם מיט טראמפ אין מאנילא האט ארויסגעברענגט זיין פראמינענטע ראלע אין די אדמיניסטראציע'ס דיפלאמאטישע באציאונגען מיט די רעגירונגען און שותפים אינעם אזיאנער ראיאן. די ווערטער זענען געקומען אין א צייט וואס טראמפ זוכט צו פארשטארקן וואשינגטאן'ס איבערגעגעבנקייט צו אירע אליאירטע, לייגנדיג א דגוש אויף דירעקטע קאמוניקאציע און א נאענטערע קאאפעראציע מיט פירער איבער די אינדא-פאסיפיק ראיאן.
זיינע קאמענטארן האבן אויך אפגעשפיגלט זיין באקאנטן צוגאנג פון נוצן פערזענליכע באציאונגען אלס א מיטל צו פארשטארקן דיפלאמאטישע און עקאנאמישע שותפות'ן. כאטש דאס ווערטל איבער'ן פייערן איז קלאר געווען בלויז א דזשאוק, האט טראמפ'ס באלדיגע לויב געמאכט דעם מאמענט פאר א הויכפונקט פון זיין אויפטריט, געבנדיג א בליק אויף די גוטע באציאונגען צווישן דעם פרעזידענט און רוביא, בעת די אדמיניסטראציע ארבעט ווייטער אויף האנדל, זיכערהייט און דיפלאמאטישע פריאריטעטן אינעם ראיאן.