בס"ד

פרעזידענט טראמפ מעלדט אן א נייע פראגראם צו באקעמפן שווינדל: וועט באצאלן 1 פראצענט קאמישאן פאר די וואס אנטדעקן פראד

פרעזידענט טראמפ האט געמאלדן א נייע אנטי-פראד פראגראם וואס וועט באצאלן א קאמישאן פון 1 פראצענט פון די צוריקגעכאפטע געלטער פאר מענטשן וואס אנטדעקן און געבן איבער אינפארמאציע איבער שווינדלערייען. "אויב טרעפסטו א ביליאן דאלאר, וועלן מיר געבן א קאמישאן פאר יענעם פערזאן פון 1 פראצענט," האט טראמפ געזאגט.

לויט א פשוט'ן חשבון, מיינט דאס א באצאלונג פון 10 מיליאן דאלאר פאר א טיפ וואס פירט דערצו אז די גאווערנמענט זאל צוריקבאקומען א ביליאן דאלאר אין געגנבעטע פאנדן. די מעלדונג איז געצילט צו פארוואנדלען דעם פשוט'ן אמעריקאנער בירגער אין א 'פראד כאפער', מיט א גרויסע באלוינונג פאר ווער עס קען צושטעלן גרויסע רעזולטאטן.

עס בלייבן אבער נאך אסאך פראגעס ארום דעם פלאן, און די גרעסטע פון זיי איז ווי אזוי די נייע אנבאט שטימט מיט די פראגראמען וואס עקזיסטירן שוין. די טרעזשערי דעפארטמענט האט שוין לאנצירט א 'וויסלבלויער' פראגראם פריער דעם יאר, וואס לויט באריכטן אפפערט עס באלוינונגען פון 10 ביז 30 פראצענט פון די קאלעקטירטע שטראפן. דאס קומט אינאיינעם מיט א ספעציעלע ווייסע הויז 'טעסק פארס' צו עלימינירן פראד, אנגעפירט דורך וויצע פרעזידענט דזשעי. די. ווענס.

אזוי ווי 10 ביז 30 פראצענט איז פיל מער ווי 1 פראצענט, איז דערווייל אומקלאר צי טראמפ'ס אנבאט איז א באזונדערע פראגראם, אן אנדערע סארט חשבון, אדער סתם אן אומפונקטליכע ווערסיע פונעם עקזיסטירנדן פראגראם. די ווערטער פונעם פרעזידענט האבן נישט קלארגעשטעלט ווער עס איז קוואליפיצירט דערפאר, ווער עס באצאלט די קאמישאן, אדער ווי אזוי די צוריקגעכאפטע סומע וועט ווערן אויסגערעכנט.

ביז די ווייסע הויז וועט ארויסלייגן די פונקטליכע רעגולאציעס, דארף מען אנקוקן די 1 פראצענט ציפער אלס א צוזאג און נישט ווי א פארטיגע פראגראם.