שרעקליכע סצענעס אין כינע: אומצופרידענער בירגער פארט אריין מיט א ריזיגן עקסקעוועיטאר אין א רעגירונגס געביידע

א 47-יעריגער מאן מיטן לעצטן נאמען 'הו' האט אנגעמאכט א געפערליכן חורבן ווען ער איז אריינגעפארן מיט אן עקסקעוועיטאר אין די 'פענגדאנג ניו סיטי' גאווערנמענט סערוויס צענטער אין די שיאן שישיאן נייע געגנט, אין די שאאנשי פראווינץ אין כינע. דער אינצידענט האט זיך אפגעשפילט דעם 9'טן נאוועמבער 2026, ארום 11 אזייגער אינדערפרי.

די ווילדע אינצידענט האט אנגעהאלטן פאר קרוב צו א שעה צייט, אין וועלכע דער מאן האט גענצליך חרוב געמאכט דעם הויפט אריינגאנג פונעם בנין, די טרעפ, די שילדן און דעם פראנט פונעם געביידע. אמווייניגסטנס זעקס טיילן פונעם קאמפלעקס זענען ערנסט געשעדיגט געווארן. בחסדי השם זענען נישט געווען קיין פארוואונדעטע, נאכדעם וואס די ארבעטער און די פובליק זענען עוואקואירט געווארן בעפאר די פאליציי איז אריינגעקומען אין בילד און אפגעשטעלט די כאאס.

טראץ די שווערע שאדנס, האבן טייל פון די סערוויס קאונטערס זיך שוין צוריק געעפנט נאך יענעם נאכמיטאג. די פאליציי האט ארעסטירט דעם פארברעכער אויפן ארט, און די לאקאלע פובליק סעקיוריטי ביורא האט געמאלדן אז זיי האבן אונטערגענומען שטרענגע קרימינאלע שריט קעגן אים און די אויספארשונג גייט נאך אן.

לויט ווי א לאקאלע באאמטער האט איבערגעגעבן פאר די מידיא, איז דער מאן געווען שטארק אומצופרידן מיט די קאמפענסעישאן געלטער וואס ער האט באקומען נאכדעם וואס די רעגירונג האט קאנפיסקירט און אראפגעווארפן זיין פארם. באריכטן געבן אן אז עס האט זיך געהאנדלט פון א בהמות פארם אדער א פיש פארם, כאטש די אטאריטעטן האבן נאך נישט אפיציעל באשטעטיגט זיין מאטיוו.

א ווידעא פונעם חורבן האט זיך שנעל פארשפרייט אנליין און געצויגן א שטארקע רעאקציע פונעם פובליק, מיט אסאך וואס האבן עס צוגעגליכן צום באקאנטן אמעריקאנער "קילדאזער" אינצידענט. טייל האבן אויסגעדרוקט סימפאטיע, זאגנדיג אז זיי פארשטייען זיין פראסטראציע איבער די אופן וויאזוי די רעגירונג באגייט זיך מיט קאמפענסעישאן ביי דעמאליציע פעלער, בעת אנדערע האבן שארף פארדאמט די סכנה און די שאדנס וואס ער האט אנגעמאכט. דערווייל בלייבן נאך אסאך פראגעס אפן, אריינגערעכנט וואס פונקטליך עס האט געפירט צום קאנפליקט און וואס עס וועט זיין זיין ענדגילטיגע אורטייל.