בס"ד

נייע פאליציי ווידעא קעמפערט אפ טענות ארום קאנטראווערסיאלע 'אייס' (ICE) שיסעריי אין טעקסאס

פרישע ווידעא רעקארדירונגען וואס זענען ארויסגעגעבן געווארן דורך די אסטין פאליציי דעפארטמענט (APD) טוישן דעם בילד ארום די קאנטראווערסיאלע שיסעריי דעם פארגאנגענעם זונטאג, ווען אן אגענט פון די 'אייס' (ICE) אימיגראציע אגענטור האט געשאסן א 28-יעריגן ווענעזועלער אימיגראנט, ווילבער ראפאעל גארסעס פערעז, וועלכער האט געארבעט אלס א 'דאר-דעש' דעליווערי דרייווער.

די נייע ווידעא קומט אין קאנטראסט מיט די טענות פון זיין לויער, קעיט לינקאלן-גאלדפינטש, וועלכע האט באהויפטעט אז אייס אגענטן האבן אים ארויסגעשלעפט פון זיין קאר נאכ'ן אים שיסן. אנשטאט דעם, צייגט די ווידעא קלאר ווי לאקאלע פאליציי אפיצירן העלפן אים ארויס פונעם קאר, שניידן אויף זיין העמד צו באהאנדלען דעם וואונד אין זיין אקסל, און געבן אים ערשטע הילף בעפארן אים לייגן אין קייטלעך.

די פאטאגראפיעס, וואס זענען צוזאמגעשטעלט געווארן פון א דעש-קעמ און סעלפאן ווידעא פון אן 'אף-דוטי' אפיציר צוזאמען מיט די באדי-קעמס פון די אפיצירן אויפן סצענע, צייגט ווי פערעז זיצט איינגעבויגן און האלט זיך דעם אקסל אין גרויסע ווייטאגן ווען די פאליציי קומט אן, און זיי פרעגן אים אויף שפאניש צי ער האט סיי וואספארא וואפן אויף זיך. אן אינטערעסאנטע און קריטישע דעטאל וואס קומט יעצט ארויס איז, אז דער אייס אגענט וואס האט געשאסן האט נישט אנגעהאט זיין באדי-קעמערע בשעת'ן אינצידענט, א זאך וואס די 'האומלענד סעקיוריטי' דעפארטמענט האט דערווייל נישט געקענט ענטפערן אדער מסביר זיין פארוואס.

עס בלייבן נאך אלץ אסאך אפענע פראגעס איבער וואס פונקטליך עס האט געפירט צו די שיסעריי. פערעז'ס לויער טענה'ט אז אן 'אומ-מארקירטע' (unmarked) אייס קאר האט אריינגעקראכט אין זיין קאר צוויי מאל בעפאר די אגענטן האבן געעפנט פייער, און זי לייקנט אפ די ווערסיע פון אייס אז עס איז פארגעקומען א פוס-יאגד בעפאר. פון די אנדערע זייט זאגט די האומלענד סעקיוריטי דעפארטמענט אז פערעז האט פרובירט צו אנטלויפן פון די אגענטן און אז ער האט געהאט א ענדגילטיגע דעפארטאציע ארדער קעגן זיך, א זאך וואס זיין לויער טענה'ט אז עס איז נישט געווארן איבערגעגעבן געזעצליך.

פערעז איז געשאסן געווארן איין מאל אין די אויבערשטע טייל פון זיין רוקן, וואס האט געבראכן זיין אקסל-ביין, און די קויל איז נאך אלץ פארבליבן שטעקן אין זיין קערפער דורכאויס די וואך. ער איז באהאנדלט געווארן אין א לאקאלע שפיטאל בעפאר ער איז אריבערגעפירט געווארן צו אן אייס פארהאלטונגס-צענטער אין פירסאל, טעקסאס. דערווייל האט א פעדעראלע ריכטער צייטווייליג אפגעשטעלט זיין דעפארטאציע, וויבאלד די טראוויס קאונטי דיסטריקט אטוירני אפיס פירט אן אויספארשונג איבער די שיסעריי, און דער ריכטער האט אנגעוויזן אז פערעז איז א הויפט עדות אינעם קעיס און מען קען אים נישט ארויסשיקן פונעם לאנד ביז די אויספארשונג ענדיגט זיך.