סעקרעטערי אוו סטעיט מארקא רוביא: מדינת ישראל איז גענוג רייך צו קויפן וואפן אן אמעריקאנער פינאנציעלע הילף

דער אמעריקאנער סעקרעטערי אוו סטעיט מארקא רוביא זאגט אז מדינת ישראל איז שוין געווארן גענוג עקאנאמיש שטארק צו קענען קויפן אמעריקאנער וואפן אן זיך דארפן פארלאזן אויף פינאנציעלע הילף פון וואשינגטאן. דאס צייגט אויף א מעגליכע טויש אין די לאנג-יעריגע מיליטערישע הילף אגרימענט צווישן די צוויי לענדער.

רעדנדיג צו רעפארטערס ביים 'דזשי-7' (G7) סאמיט פון אויסערן מיניסטארן אין פאריז, דעם 9'טן נאוועמבער, האט רוביא געזאגט אז פרעזידענט דאנאלד טראמפ וויל אז די פינאנציעלע טייל פון די אמעריקאנער הילף זאל זיך ענדיגן ווי פריער.

"מדינת ישראל איז יעצט גענוג רייך און סוקסעספול צו קענען זיין א לאנד וואס קויפט אליין. זיי קענען קויפן די וואפן פון אונז, אבער מיר דארפן שוין נישט צושטעלן די פיינענסינג," האט רוביא מסביר געווען. ער האט צוגעלייגט אז מדינת ישראל באאמטע האבן אליין אויפגעברענגט די מעגליכקייט פון זיך אפגעוואוינען פון די אמעריקאנער פינאנציעלע שטיצע. רוביא האט אויך געזאגט אז מדינת ישראל קען מעגליך אנהייבן פינאנצירן אירע אייגענע פארטיידיגונגס איינקויפן אין יאר 2027, געווענדעט לויט די רעזולטאטן פון די פארהאנדלונגען. דאס באדייט אז וואשינגטאן און ירושלים פארהאנדלען אריבערצוגיין צו א סיסטעם פון קאמערציאלע וואפן איינקויפן און א פארברייטערטע פארטיידיגונג קאאפעראציע, אנשטאט די יעצטיגע סיסטעם פון יערליכע מיליטערישע גראנטן.

די געשפרעכן זענען ארום די יעצטיגע 10-יעריגע אמעריקע-מדינת ישראל אגרימענט וואס איז אונטערגעשריבן געווארן אין 2016, וואס שטעלט צו ארום 38 ביליאן דאלאר אין מיליטערישע הילף פאר די יארן פון 2019 ביז 2028, וואס קומט אויס צו בערך 3.8 ביליאן דאלאר א יאר. פרעזידענט טראמפ האט לעצטנס געזאגט אז ער ערווארט אז די הילף זאל זיך ענדיגן ענדע 2026, טענה'נדיג אז פרעמיער מיניסטער בנימין נתניהו האט איינגעשטימט צו דעם פארגעשלאגענעם טויש. נתניהו האט שוין פריער אויסגעדרוקט אינטערעסע אין ביסלעכווייז רעדוצירן די אפהענגיקייט פון מדינת ישראל אין אמעריקאנער מיליטערישע הילף אין די קומענדיגע צען יאר, כאטש די יעצטיגע פלאן זעט אויס צו גיין פיל שנעלער.

רוביא האט אנגעוויזן אז די פארהאנדלונגען איבער א נייע אגרימענט וועלן אדרעסירן די טראנזיציע פעריאד און נייע געלעגנהייטן פאר געמיינזאמע וואפן פראדוקציע. דאס מיינט אז דאס ענדיגן די דירעקטע פיינענסינג וועט נישט דורכאויס אפשטעלן די אמעריקע-מדינת ישראל פארטיידיגונג קאאפעראציע אדער אמעריקאנער וואפן פארקויפונגען פאר מדינת ישראל. די עקזיסטירנדע אפמאך בלייבט דערווייל אין קראפט, און סיי וועלכע טוישונגען צו די יערליכע אמעריקאנער פאנדינג וועט אויך דארפן באשטעטיגט ווערן דורך קאנגרעס. די פראגע וואס בלייבט יעצט איז ווי שנעל די צוויי רעגירונגען קענען אויסארבעטן א נייעם אפמאך בשעת'ן אנהאלטן זייער נאנטע מיליטערישע און זיכערהייט שותפות.