פרעזידענט טראמפ: "אמעריקע וועט טון ביזנעס מיט רוסלאנד און אוקריינע נאך א שלום אפמאך"

פרעזידענט דאנאלד טראמפ זאגט אז ער וויל זען ווי רוסלאנד און אוקריינע קומען צו אן אפמאך צו ענדיגן די מלחמה, כדי די פאראייניגטע שטאטן זאל קענען צוריקגיין צו נארמאלע ביזנעס מיט ביידע לענדער.

"איך גלייב אז מיר וועלן טון ביזנעס מיט אוקריינע און מיט רוסלאנד נאכדעם וואס די מלחמה ענדיגט זיך," האט דער פרעזידענט געזאגט אין א קורצע ווידעא קליפ.

זיין צוגאנג איז זייער פשוט: קודם שלום, און דערנאך וועט מען צוריקשטעלן די האנדל און עקאנאמישע פארבינדונגען מיט ביידע זייטן. די מלחמה, וואס האט זיך אנגעהויבן מיט די רוסישע אינוואזיע אין פעברואר 2022, האלט נאך אלץ אן יעצט ענדע 2026 אן קיין קלארע לייזונג, וואס דאס ברענגט פילע צו פרעגן ווי נאנט א שלום אפמאך איז באמת.

דאס איז נישט די ערשטע מאל וואס טראמפ רעדט אין דעם ריכטונג. נאך אין אפריל 2025 האט ער געזאגט אז אויב רוסלאנד און אוקריינע וועלן מאכן אן אפמאך, וועלן ביידע "טון גרויסע ביזנעס" מיט אמעריקע. זיין ספעציעלער שליח, סטיוו וויטקאף, האט אויך לעצטנס געזאגט אז אמעריקאנער קאמפאניס וועלן זיך קענען צוריקקערן צו טון ביזנעס אין רוסלאנד ווי נאר מען גרייכט א שלום אפמאך.

פון די אנדערע זייט, האבן פרישע באריכטן אין די 'ניו יארק טיימס' אנגעוויזן אז די ווייסע הויז באטראכט מעגליך צו מאכן געוויסע ביזנעס דיעלס מיט רוסלאנד נאך בעפאר די מלחמה קומט צו אן ענדע, וואס דאס גייט אביסל קעגן זיין פריערדיגע שטעלונג אז האנדל מוז ווארטן אויף שלום.

קריטיקירער זארגן זיך אז די עקאנאמישע בענעפיטן קענען עווענטועל שפילן לטובת מאסקווע, בעת שטיצער פונעם פרעזידענט זאגן אז דאס קען פונקט פארקערט געבן פאר ביידע זייטן א שטארקע סיבה אויפצוהערן קעמפן.